Aqtóbede turǵyndar Iegova kýágerleri shirkeýiniń aldynda narazylyq sharasyn ótkizdi. Olar dini uiymnyń jabylýyn talap etip otyr, dep habarlaidy KTK arnasy.
Narazy toptyń aitýynsha, Iegova kýágerleriniń kesirinen birshama adam zardap shekken. Jinalǵandar arasynda baspanasynan airylǵandar da bar kórinedi. Áitse de, dini birlestik basshylary olardyń qarsylyǵyna qatysty ún qatpady.
Aqtóbe shetindegi bul shirkeýde Iegova kýágerleriniń qulshylyq etip kele jatqanyna jiyrma jyldan asqan. Munda jinalǵan din ókilderi bul joly minájat etýdiń ornyna, qaqpa aldyna qaraǵyshtaýmen boldy. Sebebi, narazylyq sharasyna jinalǵandar dini uiymnyń jabylýyn talap etýde.
Urandatyp shyqqandardyń sózinshe, barlyǵy derlik osy iegova kýágerlerine aldanyp qalǵan kórinedi. Biri otbasymen aralaspai ketkenin osy din ókilderinen kórse, endi biri solardyń kesirinen dalada qalǵanyn aitady.
"Ájem Iegova kýágerlerine úiimizdi tartý etti. Qujatty rásimdep bergennen bir apta ótisimen qaitys boldy. Olardyń ájemniń basyn ainaldyryp, psihologiialyq qysym kórsetip, alaiaqtyq jolmen baspanamyzdy alǵanyna senimdimin. Qazir men eki balammen solardyń kesirinen dalada qańǵyp qaldym", - deidi Aqtóbe qalasynyń turǵyny Iýlia Iaroslavtseva.
Amanjol esimdi taǵy bir turǵyn: "Balalaryna qarsy shyǵady kóbinese. Otbasyna qarsy shyǵady. Eger dinge kirmese, solar adam qurly kórmeidi", - deidi.
Al dini birlestik basshylary munyń bári jala dep otyr. Biraq olardyń ashyq málimdeme jasaǵysy joq. Elimizde Iegova kýágerleriniń alǵashqy qaýymy osydan 27 jyl buryn resmi tirkelgen. Óńirlerde onyń alpysqa jýyq birlestigi bar. Qazaqstanmen kórshiles memleketterdiń barlyǵy derlik bul uiymǵa tyiym salǵan. Reseidiń ózi eki jyl buryn olardy ekstremistik uiym dep tanydy.
