Aqtóbelik jastar turǵyn úimen qamtamasyz etilmek. Bul týraly Óńirlik kommýnikatsiialar qyzmetinde ótken baspasóz konferentsiiada oblystyq jastar saiasaty máseleleri basqarmasynyń basshysy Nurlan Kúntýov málimdedi.
Basqarma basshysynyń aitýynsha, bul baǵyt Elbasymyz jariialaǵan Jastar jyly aiasynda júzege asyrylyp, júzdegen jas aqtóbelikterdi turǵyn úimen qamtamasyz etýge baǵyttalǵan.
«Qazirgi ýaqytta jastar úshin ózekti máselelerdiń biri - óz baspanasynyń bolmaýy bolyp tabylady. Osyǵan bailanysty Aqtóbe oblysy ákiminiń tapsyrmasyna sai, Aqtóbe qalasynyń ákimdigi, oblystyq jastar saiasaty máseleleri basqarmasy «Turǵyn úi qurylys jinaq banki» AQ-men birlese otyryp, jastar men jas otbasylardy turǵyn úimen qamtamasyz etý boiynsha baǵytty iske asyrýǵa kiristi», - dedi Nurlan Kúntýov.
Atalmysh biregei baǵdarlamaǵa 29 jasqa deiingi oblys turǵyndary qatysa alady. Olar aýdany 40-50 sharshy metr bolatyn 1 bólmeli páterlerge úmitker bola alady, bul rette turǵyn úi alańy úshin bastapqy jarna kólemi ortasha eseppen 350 myń teńgeni, al ai saiynǵy tólem 35 myń teńgeni quraidy.
