Dimash Qudaibergenniń portreti Aqtóbe qalasynyń 150 jyldyǵy men ánshiniń 25 jasyna orai salyndy, dep habarlaidy QazAqparat tilshisi.
Portret Aqtóbe qalasyndaǵy 12 yqsham aýdannyń sánin keltirip tur. Bes qabatty turǵyn úidi ákimdik tańdap, ánshiniń sýretin merdigerlerge bergen eken. Aty-jónin aitýdan bas tartqan sýretshi nebári úsh kúnde portretti salyp shyqty.
«Aqtóbe qalalyq sáýlet jáne qala qurylysy bóliminiń usynysymen Dimashtyń portreti salyndy, oǵan demeýshiler qoldaý kórsetti. Sýretshi aty-jónin qupiia saqtaýdy jón kórip otyr. Boiaý sýyqqa, kúnge, jańbyrǵa tózimdi. Tipti jeti jylǵa deiin saqtalady dep otyr. Bul bizdiń alǵashqy jobamyz», - dedi merdiger Berik Aqylbaev.
Aita keteiik, Dimash Qudaibergen 25 jasqa toldy. Ol óz týǵan kúninde Aqtóbege kelip, qarttar úiindegi turǵyndarmen kezdesti.
