Aqtóbe turǵyny jyn jailaǵan úiden otbasymen birge qashyp shyqqan. Qalanyń irgesindegi aýyldardyń birinde turǵan ol únemi otbasy músheleriniń mazasy qashyp júrgenin jetkizdi, dep jazdy "Tilshi".
«Ras, turǵan úiimiz eski boldy. Biz ony jaldap turdyq. Bizben birge turatyn stýdent quda balamyz úige kirýden shoshyp, úlkender kelgenshe dalada kútip otyrǵan. Sóitsek, úidiń ishinde ony bir eles mazalaityn bolsa kerek. Taǵy birde, syrttaǵy ájethananyń janynan kishkentai balasy bar áiel beinesi ketpei qoidy. Óz úiimizden ózimiz qorqa bastadyq», — dedi jasy 20-21 jas shamasyndaǵy aqtóbelik.
Aty-jónin kórsetpeýdi ótingen ol ata-anasymen birge aýylǵa kóship ketkenin aitady. Kóshede jyn kirip ketken adamdardy birden baiqaitynyn alǵa tartady. Jasy birazǵa kelgen adamdar balanyń tilimen sóileidi. Nemese, daýysy gújireiip shyǵatyn úlken er azamattardyń áiel daýysymen sandyraqtaityn bolsa kerek. «Ondai kezde «ishine jyn kirgen eken ǵoi» dep júre beretin halge jettim» deidi turǵyn.
«Aqtóbeniń eski bóligindegi úilerdiń birinde de jyndar jii kezigedi. Óz basym stýdent qyzdyń boiynan jyndy shyǵardym. Únemi shyńǵyryp aiqailap jatady eken. Dem salyp, jynyn shyǵaramyn. Qasymyzda júrgen qyzdar men jigitter biledi. Jyn kirgen sátte olar basqa bólmelerge qashyp ketken. Eń bolmaǵanda eki-úsh jigit kelip, kómektesse deisiń ǵoi. Óitkeni, boiynda jyny bar adam ál bermeidi. Anaý-mynaý er adamdardy jerge atyp urady. 4-5 erkek jabylǵanda álderi jetpei jatady», — deidi Aqtóbeniń turǵyny «Tilshige» bergen suhbatynda.
Álgi boijetkenniń boiynan jynyn shyǵaryp bergen soń, jaǵdaidyń qalai bolǵanyn da surastyrsa kerek.
«Qyzdyń aitýynsha, kózi kórmei qalady, sý qarańǵy jerge qara kiim kigen jyndar birinen soń biri kirip, qatarymyzǵa qosylasyń dep qorqytatyn siiaqty. Qol-aiaǵynan jabylyp ustap alyp, silikpesin shyǵarady eken. «Áitpese, óltiremiz» dep qylǵyndyrady. Adam sol kezde jan daýysy shyǵyp, aiqailai bastaidy. Kúshi de eselenedi. Meniń túsinigimde dem salý — quran súrelerin oqyp, jyndardy qaitarý. Jyndar las jerde júredi. Úide quran bolsa, ony joǵaryǵa alyp qoiýdyń qajeti joq. Únemi oqyp júrý kerek. Jyndar quran oqylatyn jerde az bolady nemese múldem bolmaidy», — deidi jigit.
Búginde áńgimelesýshimiz aýylda baspana jaldap turady. Árdaiym qolynan quran tastamai, súreler oqyp júretinin aitady.
