Nazarbaev ziiatkerlik mektebindegi himiia pániniń muǵalimi Ǵalymjan Tóleýshov áleýmettik jeli arqyly esep shyǵarýdy úiretip júr. «Bolashaq» baǵdarlamasynyń túlegi UBT-ǵa daiyndyqty bastap ketken, dep habarlaidy QazAqparat.
Ǵalymjan Tóleýshov Aqtóbe qalasynda bilim alyp, mektep bitirgen soń Nur – Sultan qalasynda ulttyq ýniversitette oqydy. Keiin «Bolashaq» baǵdarlamasymen tájiribe jinady. Himiia ǵylymdarynyn magistri, Ulybritaniiada tájiribe almasý kýrsynyn katysýshysy, halyqaralyq IELTS sertifikaty – 7.5. Sonymen qatar qazaq ádebietine degen qyzyǵýshylyǵy zor, óleń shyǵarady. Shetelde bilim alyp kelgen soń elordadaǵy joǵary oqý ornynda dáris berdi. Keiin ata-anasynyń janyna kelip, mektepke jumysqa ornalasty.
«Alǵashynda taqyryptyq esepterge suranys joǵary boldy. Qazir UBT suraqtaryna basymdyq berilip jatyr. YouTube videohostingindegi kanalda biryńǵai qazaq tilinde video salyp júrmin. Aptasyna bir ret bailanysqa shyǵamyn. Bir videoda 5-6 eseptiń sheshimi bolady. 10 minýttan asyp ketse, adamdar jalyǵyp ketedi», - dedi ol. Jas mamannyń «ChemEasy – himiia bizben jeńil» YouTube kanalynda biryńǵai qazaq tilinde onlain sabaq men eksperiment júrgizgenine bir jyldan asty. Bul ideia 12 synyp oqýshylaryn Kembridj halyqaralyq emtihanyna daiyndaý barysynda týyndaǵan. Ustaz bastapqy ýaqytta videolar aǵylshyn tilinde túsirilgenin, keiin qazaq tiline kóshkenin aitty.
«Aǵylshyn tilindegi materialdardyń keń aýqymyn baiqadym. Al himiia pánin oqytatyn qazaqsha kanaldar joqtyn qasy jáne aqyly. Saraptamadan soń ana tilimizde shaǵyn videolardan turatyn qoljetimdi kontent jasaýdy uiǵardym. YouTube jelisiniń aqparattyq rólin ǵana qarastyryp qoimai, oqytý resýrsy retinde bilimniń damýyna jol ashatynyń atap ótý kerek», – deidi aqtóbelik ustaz. Ziiatkerler ózderine qyzyqty taqyryptardy usynady, kanaldy árlendirý joldarymen kómektesedi. Aldaǵy ýaqytta aǵylshyn tilinde NUFIPET, SAT emtihandary baǵytynda jańa videolar túsirý josparda bar. Kanalǵa 750 adam jazylǵan. Qoldanýshylardyń jasy 13 pen 24 jas aralyǵynda.
«Jospar boiynsha aqparattyq portal ashyp, kúndelikti sabaǵymdy onlain ótkizgim keledi. Bir jyldan soń iske asyryp, jańa baǵytty qamtýdy maqsat ettim», - dedi ol.
