Aqtóbede maýsymda soiqan salǵan sodyrlar sotta sońǵy sózderin aitty, - dep habarlaidy KTK telearnasy. Olardyń barlyǵy derlik kinálaryn moiyndap, sýdiadan ómir boiyna túrmege otyrǵyzbaýdy suraǵan. Óitkeni prokýrorlar buǵan deiin jazdaǵy atysta tiri qalǵan 7-i lańkestiń aqtyq demi bitkenshe temir torda qalýyn suraǵan edi.
"Birneshe qylmystyq quqyqbuzýshylyq jasaǵandary úshin, onyń ishinde terrorizm aktisin jasaýǵa tikelei qatysqandary úshin aiyptalǵan sottalýshylar sońǵy sózinde jasaǵan qylmystary úshin ókinip, sottan ómir boiy bas bostandyǵynan aiyrmaýdy surady", - dedi Aqtóbe oblystyq sotynyń baspasóz hatshysy Iliada Dosova.
Qarýly qaqtyǵysqa qatysty dep tanylǵan sottalýshynyń biri Jubanovty advokaty birneshe bap boiynsha aqtaýdy ótindi. Sondai-aq, qylmys týraly quzyrly organdarǵa der ýaqytynda habar bermegeni úshin aiyptalǵan bes jigitti jazyqsyz dep tanýdy surap otyr. Degenmen, olarǵa kesiler úkim endi týra bir aptadan soń ǵana belgili bolady. 5-shi maýsym kúni sodyrlar áskeri bólim men qarý satatyn dúkenderge shabýyl jasaǵan edi. Atys kezinde jeti adam qaza taýyp, otyz shaqty adam jaraqat aldy. Sol lańkestikten keiin 18 sodyrdyń kózi joiylǵan bolatyn.
