Aqtóbede 55 jastaǵy er adamnan koronavirýs infektsiiasy anyqtaldy. Qazir onymen bailanysta bolǵan barlyq adam oqshaýlandy, dep habarlaidy "Ult aqparat".
Aqtóbe oblysynda COVID-19 infektsiiasyn juqtyrǵandar sany barlyǵy – 14. Búgin 1965 jyly týǵan er adamnyń koronavirýs infektsiiasyn juqtyrǵany tirkeldi. Ol oblystyq juqpaly aýrýlar statsionarynyń boks-palatasyna jatqyzyldy. «Naýqastyń jaǵdaiy qanaǵattanarlyq. Hattamaǵa sáikes bekitilgen tiisti emdik sharalar jasalyp jatyr. Dert oshaǵynda dezinfektsiialyq sharalar jasaldy, naýqas turǵan úi podezi karantinge jabyldy. Qazir jergilikti politsiia qyzmeti kúzetip tur. Ol adammen qarym-qatynasta bolǵandardyń bári anyqtalyp, oqshaýlandy», - dedi Aqtóbe oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti.
Al oblystyq densaýlyq saqtaý basqarmasynyń habarlaýynsha, 15 sáýir kúni saǵat 14:34-te jedel járdemge shaqyrý túsken. Brigada arnaiy kiimmen naýqastyń úiine baryp, onyń úsh kúnnen beri dene qyzýy kóterilip, basy aýyrǵanyn, ózin álsiz sezingenin bildi. Keiin odan birden analiz alynyp, tekserýge jiberdi.
«Naýqastyń aitýy boiynsha shetelge, Aqtóbe qalasynyń syrtyna shyqpaǵan jáne koronavirýs juqtyrǵan adamdarmen buryn bailanysta bolmaǵan. 16 sáýir kúni saǵat 5:00-de diagnoz zerthanalyq túrde rastaldy. Indetke shaldyqqan adam dispanserlik esepte tur. Júrek ishemiiasy, qant diabeti, arteriialyq gipertenziiamen aýyrady», - dep habarlaidy oblystyq densaýlyq saqtaý basqarmasy.
