Q. Jubanov atyndaǵy Aqtóbe óńirlik memlekettik ýniversiteti 27 qytailyq kompaniiamen memorandýmǵa qol qoidy. Óńirdegi iri oqý orny investorlarǵa kadr daiyndap, qytailyq mamandarǵa qazaq tilin úiretedi, dep habarlaidy QazAqparat tilshisi.
Atalǵan memlekettik ýniversitet Konfýtsii institýtynyń jumysyn jandandyryp jatyr. Qazaq-qytai stýdentteri joǵary oqý oryndarynyń kelisimimen bir-birine baryp, bilimin jetildirýde. Sonymen qatar, 20 oqytýshy ózara almasyp, tájiribelerin shyńdap júr. Búgin oqý orny Qytai investorlaryn qabyldap, kadr daiyndaý men ǵylymdy damytý jolynda birge jumys isteýge kelisti.
«Ýniversitet pen kompaniialar arasynda seriktestik ornatý, dýaldy oqytý júiesiniń negizinde birlese bilim berý, kompaniialar bazasynda stýdentterdi is-tájiribeden ótkizý, jumysshylardy ýniversitette biliktilikti arttyrý kýrstarynan ótkizý, ǵylymi-zertteý jumystaryn júzege asyrý úshin aldyn-ala kelissóz júrip, bir bailamǵa keldik. Ýniversitet óz tarapynan kompaniialardyń óndiristik suranystaryna orai munai-gaz isi, ekonomika, filologiia mamandyqtarynda qosymsha bilim traektoriialaryn meńgerýge múmkindik beretin bilim baǵdarlamalaryn jasaqtady. Sondai-aq, munai-gaz isi, kólik, kólik tehnikasy jáne tehnologiiasy, beiorganikalyq, organikalyq zattardyń himiialyq tehnologiiasy, qurylys mamandyqtarynda dýaldy oqytýdy engizý qolǵa alynýda. Stýdentter úshin praktikalyq, zerthanalyq sabaqtar, diplomdyq jobalar boiynsha izdenister, óndiristik tájiribeler sol kompaniialarynda uiymdastyrylatyn bolady», - dedi Q. Jubanov atyndaǵy Aqtóbe óńirlik memlekettik ýniversitetiniń rektory Baýyrjan Erdembekov.
Aita keteiik, yntymaqtastyq memorandýmyna qol qoiǵan kompaniialar arasynda «SNPS- Aqtóbemunaigaz» AQ, «Uly Qabyrǵa» JShS-i sekildi iri óndiris oryndary bar. Baýyrjan Erdembekov óndiris oryndarynyń basshylaryna kompaniia bazasynda ýniversitet kafedralarynyń filialdaryn ashýdy usyndy.
«Oqý orny men Qytai kompaniiadary arasyndaǵy kelisim shartqa eki ai boiy daiyndaldyq. Munai-gaz isi, tehnikalyq mamandyq ieleri men tilshilerdi sol kompaniialardyń suranysyna sai, jańa tehnologiiamen oqytýdy josparlap otyrmyz. Sonymen qatar, Konfýtsii institýty arqyly Qytai kompaniialaryn qazaqtandyrý máselesi qolǵa alyndy. Buǵan deiin oblys ákimi Berdibek Saparbaev Qytai komaniiasynyń jumysshylarymen kezdesýinde eskertý jasaǵan bolatyn. Suranys bar, olar qazaq tilin úirengisi keledi»,- dedi ýniversitet rektory.
