Aqtóbe jurty keshe taǵy da dúrligip qaldy. Tań atysymen qarý asynǵan arnaiy jasaq qala shetindegi munai óńdeitin zaýytty qorshaýǵa alǵan. Aimaqta qara altyn urlaýmen ainalysyp júrgen qylmystyq toptyń múshelerin osynda qolǵa túsiripti. Olardy ustaý úshin tártip saqshylarynan bastap, ulttyq qaýipsizdik komiteti men jemqorlyqqa qarsy kúres biýrosynyń ókilderi de tartylypty. Belgili bolǵandai, kúdiktiler radikaldy salafizm aǵymyn qoldaýshylar eken. Qara altyndy zańsyz saýdalap, qyrýar qarjymen qalta qampaitqandardyń lańkestik piǵyldaǵy toptarmen bailanysy bary da anyqtalǵan.
-Aqtóbedegi munai óńdeý zaýyty qala shetinde ornalasqan. Qazir munda eshkimdi syrttan kirgizbeidi, al jumysshylary men qyzmetkerleri qamaýda otyr.
Mundaǵylar tań atysymen qarý asynǵan saqshylardyń saý ete qalaryn kútpegendei. Sebebi kórip turǵandaryńyzdai zaýytqa munai ákelgen ondaǵan kólik qaqpa aldynda irilip tur.
Al kásiporyn ainalasyn ishki áskerdiń sarbazdary qorshaýǵa aldy. Óitkeni urlanǵan qara altyndy qylmystyq top osynda tapsyryp kelgen eken. Jetkizýshilerdiń birin Ulttyq qaýipsizdik qyzmetkerleri osy kásiporynǵa keler jolda ustapty. Al qaraqshylyq jolmen alynǵan qara altyndy satýǵa deldaldyq etken taǵy bir turǵyn óz páterinen tutqynǵa alynǵan. Ózin Dosýpov dep tanystyrǵan odan munaiǵa qatysty qujattar tárkilendi.
Quzyrly organdar munai urlyǵymen ainalysatyn qylmystyq topty ustaý úshin operatsiiany birneshe ai boiy josparlapty. Óitkeni músheleriniń kóptiginen jáne elimizdiń túkpir-túkpirinde turatyndyǵynan biraz qiyndyq týyndaǵan. Sondyqtan tek Aqtóbede ǵana emes, Qandyaǵash qalasyndaǵy munai óńdeitin «Vernal Oil» zaýyty da qorshaýǵa alyndy. Onda da qylmyskerler urlanǵan qara altyndy ótkizetin óz jelilerin quryp alǵan eken. Olardyń barlyǵyn Erkin Izbasarov Almatyda otyryp basqarypty. 50 jastaǵy bul azamat qylmys áleminde «Aǵaiyndy tórteý» degen laqap atpen tanymal toptyń serkesi. Arbaǵa tańylsa da, elimizdegi munai urlyǵyn baqylap, ony qaida ótkizip, aqshasyn qaida jiberýdi buiyryp otyrǵansol deidi Ulttyq qaýipsizdik komitetindegiler. Ol da búgin Almatyda oqqaǵary men kólik júrgizýshimen birge kóshe boiynda kóligimen ketip bara jatqan jerinen ustaldy.
Ulttyq qaýipsizdik komiteti taratqan málimetterge qaraǵanda qylmystyq toptyń músheleri radikaldy salafitterdi qoldaýshylar eken. Osyndai lańkestik piǵyldaǵy toptar munai urlyǵymen júieli turde ainalysyp, tabysty kásipten tapqan aqshasyna qarý-jaraq satyp alyp otyrǵan. Ázirge qylmystyq toptyń quramynda qansha adamnyń bolǵanyn jáne qanshasynyń ustalǵanyn quzyrly organdar ashyp aitpai otyr.
