Foto: egemen.kz
Hromtaý aýdanyndaǵy Dóń ken baiytý kombinatynda jumysshy aýyr jaralandy, dep habarlaidy QazAqparat.
Dóń ken baiytý kombinatynyń 28 jastaǵy jumysshysy jaralanyp, aýrýhanaǵa tústi. Aqtóbe oblystyq eńbek inspektsiiasy basqarmasy basshysynyń orynbasary Talǵat Iskarinniń habarlaýynsha, taý-ken sheberi sý nasosyn teksergen. Sol kezde nasos birneshe bólikke bólinip, jumysshynyń aiaǵy men qolyna zaqym keledi. Ony aldymen Hromtaý aýdandyq aýrýhanaǵasyna jetkizgenimen, keiin oblystyq jedel meditsinalyq járdem aýrýhanasyna tasymaldanǵan. Emdeý ornynda ota jasaldy.
«Aiaǵy synyp, jilinshigine zaqym kelgen. Ashyq jarasy bar. Qolynyń saýsaqtary da synǵan. Jaǵdaiy ortasha aýyr. Qazirgi kezde travmatologiia bóliminde em qabyldap jatyr», - dep habarlady oblystyq densaýlyq saqtaý basqarmasy.
Aita keteiik, buǵan deiin Aqtóbedegi altyn óndiretin ken ornynda bir jumysshy qaza boldy. Osy oqiǵaǵa bailanysty oblystyq eńbek inspektsiiasy basqarmasy tekserý júrgizip jatyr.
