Foto: Astana ákimdigi
Aqtóbe qalasynda barlyq baǵytta jol jabyq. Sonymen birge qala mańyndaǵy turǵyn úi alaptaryna qatynaityn qoǵamdyq kólik júrmei jatyr, dep habarlaidy «Ult aqparat» Kazinformǵa silteme jasap.
Aqtóbe qalasynda qazir aqtútek boryn bolyp tur. Búgin mektep pen kolledjderde sabaq onlain ótip jatyr. Sonymen birge №41, 44, 45, 49, 43, 37, 21 baǵyttardaǵy Órleý, Aqshat, Janaqonys, Bekqul baba, Sazdy, Qurshysai, Jańaqonys turǵyn alaptaryna qatynaityn avtobýstar toqtatyldy.
Aqtóbe qalasy ákiminiń baspasóz qyzmetiniń habarlaýynsha, bul aýmaqtardy politsiia baqylaýǵa alyp, qatynasqa shekteý qoiǵan.
Aqtóbe qalasynda boran saldarynan turǵyn úidiń shatyry da ushyp ketti.
- Jel ekpininiń kúsheiýi saldarynan keibir baý-baqsha ujymdarynda elektr jelisi úzildi. Qazirgi ýaqytta «Energosistema» brigadalary jóndeý jumysyn júrgizýde. Áýeqalashyǵy 1/1 mekejaiynda turǵyn úidiń shatyry ushty. Munda da jóndeý júrgiziledi, - dep habarlady Aqtóbe qalasy ákiminiń baspasóz qyzmeti.
