Aqtóbede avtobýs órtine qatysty sot otyrysy jalǵasyp jatyr. Sotqa qatysqan 22 jábirlenýshiniń ókili qaza bolǵan árbir ózbekstandyq úshin 150 million teńge moraldyq ótemaqy surady, dep habarlaidy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda avtobýs órtine qatysty is qaralyp jatyr. Búgin advokat Aqjan Aqylova tikelei bailanysqa shyǵyp, jábirlenýshilerdiń ókilderi qoiǵan talapty oqydy.
«Sot otyrysyna qatysyp, jaýap bergen Ózbekstannyń 22 azamaty qaza bolǵan adamdardyń árqaisysy úshin 150 million teńge moraldyq shyǵyn talap etip otyr. Sonymen qatar, Ózbekstannyń Namanǵan qalasynan kelgen Hatamov pen Madrahimov taǵy 20 adamnyń ótinishin jetkizdi. Olar sotqa qatysa almaitynyn aityp, aiyptalýshylarǵa eń qatań jaza berýin jáne moraldyq shyǵyn retinde qaza bolǵan ár adamǵa 150 million teńge surap otyr»,- dedi qorǵaýshy Aqylova.
Eske salsaq, sot otyrysy kezinde sottalýshylar Nurjan Qyrǵyzbaev, Maqsat Pernebekov pen Barat Tańatov, Nurlybek Tilepbaev, Bahadúr Perdebaev ózine taǵylǵan aiyppen kelisken joq. Barlyǵy óz kinásin moiyndamady. Qazirgi ýaqytta is materialyn zertteý bastaldy.
