Aqtóbe qalasynda №24 baǵyttaǵy avtobýs júrgizýshisi jolaýshyny uryp tastady. Osy oqiǵaǵa bailanysty oblystyq IID qylmystyq is qozǵalǵanyn málimdedi, dep habarlaidy QazAqparat tilshisi.
Aqtóbe qalasyndaǵy jolaýshylar tasymalymen ainalysatyn «Avtopark» JShS júrgizýshisi jolaýshyny uryp tastady. Oqiǵany sol avtobýs ishinde bolǵan jolaýshynyń biri uialy telefonyna túsirip, keiin áleýmettik jelige jariialap jibergen. Qala turǵyndarynyń narazylyǵyn týǵyzǵan oqiǵadan soń oblystyq IID júrgizýshiniń ustalǵanyn, qylmystyq is qozǵalǵanyn aitty.
«Qylmystyq kodekstiń «Buzaqylyq» baby boiynsha sot aldy tergeý jumystary júrip jatyr. Júrgizýshiniń kim ekeni anyqtalyp, Sazdy politsiia bólimine jetkizildi»,- dep habarlady oblystyq IID baspasóz qyzmeti.
Aita keteiik, áleýmettik jeli qoldanýshylarynyń biri sol avtobýs ishinde bolǵanyn, qoǵamdyq kóliktiń aialdamalarǵa toqtaý ýaqyty azaiyp, kondýktor adamdardyń tez túsip, minýin talap etkenin jáne jolaýshy óz aialdamasynda túsip úlgermegeni úshin soqqyǵa jyǵylǵanyn aitty. Al «Avtopark» JShS bul oqiǵaǵa qatysty qandai da bir aqparat berýden bas tartty.
