Aqtóbede 24 jastaǵy jaiaý júrginshini kólik qaǵyp ketti. Ol aýrýhanaǵa jatqyzyldy, dep habarlaidy QazAqparat.
Oqiǵa 6 jeltoqsan kúni Aqtóbe qalasynda boldy. «VAZ-21099» avtokóliginiń júrgizýshisi Mánshúk Mámetova kóshesinde 24 jastaǵy jaiaý júrginshini qaǵyp ketken.
«Jol apatynan keiin kólik júrgizýshisi belgisiz baǵytqa qashyp ketken. Politsiia qyzmetkerleri jedel-izdestirý sharalaryn júrgizý barysynda 32 jastaǵy júrgizýshini ustady.
Meditsinalyq saraptama qorytyndysyna súiensek, júrgizýshi kólikti jeńil dárejedegi mas kúiinde basqarǵan. Jol-kólik oqiǵasy saldarynan jaiaý júrginshi Aqtóbe qalalyq jedel járdem aýrýhanasyna jatqyzyldy», - dedi oblystyq Politsiia departamenti baspasóz qyzmetiniń jetekshisi Erbolat Sarqulov.
Oqiǵaǵa qatysty Qylmystyq kodekstiń «Alkogoldik, esirtkilik jáne (nemese) ýytqumarlyq masań kúide kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy» baby boiynsha sotqa deiingi tergeý júrgizilip jatyr.
