Foto: Altynai Saǵyndyqova/Kazinform
Aqtóbe qalasynda Jańa jyl merekesine orai bezendirý jumysy Táýelsizdik kúninen keiin ǵana bastalady. Ortalyq alańdaǵy shyrshany qurý, bezendirýge biyl da qarjy bólinbeidi, dep habarlaidy "Ult aqparat" Kazinform-ǵa silteme jasap.
Aqtóbe qalasynda sońǵy jyldary Jańa jyldyq bezendirýge biýdjetten qarjy bólinbei keledi. Biyl da burǵan deiingi shyrshalar men áshekeilerdi paidalanady.
- Qalanyń basty shyrshasy QR Tuńǵysh Prezidenti atyndaǵy ortalyq mádeniet jáne demalys saiabaǵynda ornatylady. Odan basqa eki aýdannyń aýmaǵynda qoiylady. Olar: Eset batyr turǵyn alabyndaǵy sýpermarket aldy, Altyn orda turǵyn alabyndaǵy Jekpe-jek saraiy men qalalyq ákimdik aldyndaǵy Áiteke bi eskertkishiniń jany. Qalany bezendirý 16 jeltoqsannan keiin bastalady. Budan bólek qalanyń kásipkerleri óz esebinen ǵimarattary ornalasqan aýmaqtaryn Jańa jylǵa orai bezendiredi. Qalalyq turǵyn úi-kommýnaldyq sharýashylyq, jolaýshylar kóligi jáne avtomobil joldary bólimi 2018 jyldan beri shyrsha satyp alýǵa, bezendirýge qarjy bólmedi. Sol kezde qansha bólingenin qazir aita almaimyz. Bul 6 jyl ótip ketken memlekettik satyp alý rásimi ári qujattar muraǵatqa jiberilgen,- dedi Aqtóbe qalasy ákiminiń baspasóz hatshysy Aigúl Baimenova.
Aqtóbe qalasy boiynsha 25-31 jeltoqsan aralyǵynda merekelik is-sharalar uiymdastyrylady.
- Bas shyrshany jaǵý rásimi, balalarǵa arnalǵan «Ǵajaiypqa toly jańa jyl» jáne estý qabileti shekteýli balalarǵa arnalǵan «Qosh keldiń, Jańa jyly!», onyń ishinde az qamtylǵan otbasylardan shyqqan balalarǵa «Jańa jyl keldi» atty shara ótedi, - dedi Aigúl Baimenova.
Aita keteiik, Jańa jyl merekesine orai Astana, Almaty jáne Shymkent qalalary arasynda qosymsha Talgo poiyzdary qatynaidy.
