Aqtóbede qiyrshyq tas shyǵaratyn zaýyt jumysshylaryna 2018 jyldyń maýsym aiynan beri jalaqy bermegen. Qazir ákimdik arnaiy komissiia qurdy, dep habarlaidy "Ult aqparat".
Aqtóbe oblysy, Shalqar aýdany, Bershúgir aýylynda qiyrshyq tas óndiretin «Jańatas Aqtóbe» JShS 100-den astam jumysshynyń ailyǵyn keshiktirip jatyr. Búgin jumysshylar kompaniianyń keńsesine baryp, óz eńbekaqysyn talap etti.
«2015 jyldan beri «Jańatas Aqtóbe» JShS-de jumys isteimin. 2018 jyldyń maýsym aiynan beri ailyq alǵanymyz joq. Aqtóbe oblysy, Shalqar aýdanynyń ákimdigine, Aqtóbe oblystyq eńbek inspektsiiasyna aryz jazyldy. Sotqa aryz jazyp, «jalaqy ýaqytyly berilsin» degen sheshim shyǵardy. Sol kezde «Jańatas Aqtóbe» JShS aryz jazyp, birinshi sot sheshimi buzyldy. Ózime 2,5 million teńge bereshek. Basshylar tek «aqsha» joq dep aitady. Ai saiyn zeinetaqy tólemi jalaqymyzdan ustalady, biraq 2015 jyldan beri túspegen», - deidi zaýyt jumysshysy Tóleý Jandýllin.
Al júrgizýshi bolyp jumys istegen Murat Myńaidarov 465 myń teńge jalaqysyn ala almai júr. Oǵan da zeinetaqy qoryna eshqandai tólem aýdarylmaǵan.
«Men 467 myń teńgeden astam jalaqymdy ala almai júrmin. Jumysshylardyń kóbi aýylda, aqsha bolmaǵan soń kezdesýge kele almady. Qalada turatyn jumysshylar kún saiyn keńsege barady», - deidi esepshiniń orynbasary Nurken Qarabalin.
Aqtóbe oblystyq eńbek inspektsiiasy basshysynyń orynbasary Baýyrjan Ýrazaevtyń aitýynsha, kompaniiaǵa tekserý júrgizilip, eńbekaqyny ýaqytyly tóleýge uiǵarym berilgen.
«2017 jyldan bastap jospardan tys tekserý júrip jatyr. Inspektsiia aiyppul saldy, uiǵarym berildi. Sot jalaqyny tóleýge mindettep, keiin sheshimdi qaitaryp jatyr eken. Sebebin anyqtaityn bolamyz», - dedi Baýyrjan Ýrazaev.
Jumysshylar oblys ákiminiń orynbasary Qairat Bekenovtyń qabyldaýynda boldy. Arnaiy komissiia tekserý júrgizip, investormen aradaǵy kelisimshartty buzý jolynda jumys atqarylady.
«Eńbekaqy qaryzy baqylaýda tur. Kásipkerge qaryz tólenbese, ken ornyn jalǵa alý kelisimsharty buzylatyny eskertildi. Qazir bir kelisimshart banktiń kepildiginde tur eken. Biz kepilde tursa da, kelisimshartty buza alamyz. Kelisimsharttyń buzylatyny jóninde resmi habarlama beriledi», - dedi Qairat Bekenov.
Aita keteiik, «Jańatas Aqtóbe» kompaniiasy jumysshylaryna 64 million teńge qaryz.
