اقتٶبەدە قيىرشىق تاس شىعاراتىن زاۋىت جۇمىسشىلارىنا 2018 جىلدىڭ ماۋسىم ايىنان بەرٸ جالاقى بەرمەگەن. قازٸر ەكٸمدٸك ارنايى كوميسسييا قۇردى, دەپ حابارلايدى "ۇلت اقپارات".
اقتٶبە وبلىسى, شالقار اۋدانى, بەرشٷگٸر اۋىلىندا قيىرشىق تاس ٶندٸرەتٸن «جاڭاتاس اقتٶبە» جشس 100-دەن استام جۇمىسشىنىڭ ايلىعىن كەشٸكتٸرٸپ جاتىر. بٷگٸن جۇمىسشىلار كومپانييانىڭ كەڭسەسٸنە بارىپ, ٶز ەڭبەكاقىسىن تالاپ ەتتٸ.
«2015 جىلدان بەرٸ «جاڭاتاس اقتٶبە» جشس-دە جۇمىس ٸستەيمٸن. 2018 جىلدىڭ ماۋسىم ايىنان بەرٸ ايلىق العانىمىز جوق. اقتٶبە وبلىسى, شالقار اۋدانىنىڭ ەكٸمدٸگٸنە, اقتٶبە وبلىستىق ەڭبەك ينسپەكتسيياسىنا ارىز جازىلدى. سوتقا ارىز جازىپ, «جالاقى ۋاقىتىلى بەرٸلسٸن» دەگەن شەشٸم شىعاردى. سول كەزدە «جاڭاتاس اقتٶبە» جشس ارىز جازىپ, بٸرٸنشٸ سوت شەشٸمٸ بۇزىلدى. ٶزٸمە 2,5 ميلليون تەڭگە بەرەشەك. باسشىلار تەك «اقشا» جوق دەپ ايتادى. اي سايىن زەينەتاقى تٶلەمٸ جالاقىمىزدان ۇستالادى, بٸراق 2015 جىلدان بەرٸ تٷسپەگەن», - دەيدٸ زاۋىت جۇمىسشىسى تٶلەۋ جاندۋللين.
ال جٷرگٸزۋشٸ بولىپ جۇمىس ٸستەگەن مۇرات مىڭايداروۆ 465 مىڭ تەڭگە جالاقىسىن الا الماي جٷر. وعان دا زەينەتاقى قورىنا ەشقانداي تٶلەم اۋدارىلماعان.
«مەن 467 مىڭ تەڭگەدەن استام جالاقىمدى الا الماي جٷرمٸن. جۇمىسشىلاردىڭ كٶبٸ اۋىلدا, اقشا بولماعان سوڭ كەزدەسۋگە كەلە المادى. قالادا تۇراتىن جۇمىسشىلار كٷن سايىن كەڭسەگە بارادى», - دەيدٸ ەسەپشٸنٸڭ ورىنباسارى نۇركەن قارابالين.
اقتٶبە وبلىستىق ەڭبەك ينسپەكتسيياسى باسشىسىنىڭ ورىنباسارى باۋىرجان ۋرازاەۆتىڭ ايتۋىنشا, كومپانيياعا تەكسەرۋ جٷرگٸزٸلٸپ, ەڭبەكاقىنى ۋاقىتىلى تٶلەۋگە ۇيعارىم بەرٸلگەن.
«2017 جىلدان باستاپ جوسپاردان تىس تەكسەرۋ جٷرٸپ جاتىر. ينسپەكتسييا ايىپپۇل سالدى, ۇيعارىم بەرٸلدٸ. سوت جالاقىنى تٶلەۋگە مٸندەتتەپ, كەيٸن شەشٸمدٸ قايتارىپ جاتىر ەكەن. سەبەبٸن انىقتايتىن بولامىز», - دەدٸ باۋىرجان ۋرازاەۆ.
جۇمىسشىلار وبلىس ەكٸمٸنٸڭ ورىنباسارى قايرات بەكەنوۆتىڭ قابىلداۋىندا بولدى. ارنايى كوميسسييا تەكسەرۋ جٷرگٸزٸپ, ينۆەستورمەن اراداعى كەلٸسٸمشارتتى بۇزۋ جولىندا جۇمىس اتقارىلادى.
«ەڭبەكاقى قارىزى باقىلاۋدا تۇر. كەسٸپكەرگە قارىز تٶلەنبەسە, كەن ورنىن جالعا الۋ كەلٸسٸمشارتى بۇزىلاتىنى ەسكەرتٸلدٸ. قازٸر بٸر كەلٸسٸمشارت بانكتٸڭ كەپٸلدٸگٸندە تۇر ەكەن. بٸز كەپٸلدە تۇرسا دا, كەلٸسٸمشارتتى بۇزا الامىز. كەلٸسٸمشارتتىڭ بۇزىلاتىنى جٶنٸندە رەسمي حابارلاما بەرٸلەدٸ», - دەدٸ قايرات بەكەنوۆ.
ايتا كەتەيٸك, «جاڭاتاس اقتٶبە» كومپانيياسى جۇمىسشىلارىنا 64 ميلليون تەڭگە قارىز.
