Foto: professional-education.ru
№2 Aqtóbe qalalyq soty «Vygodnyi depozit» JShS-in quryp, adamdarǵa 4 mlrd teńge shyǵyn keltirgen sottalýshylarǵa úkim shyǵardy. Olar kólikti qymbat baǵaǵa satyp berýge ýáde etken, dep habarlaidy QazAqparat agenttigi.
№2 Aqtóbe qalalyq soty Qylmystyq kodekstiń «Qarjylyq (investitsiialyq) piramidany qurý jáne oǵan basshylyq etý», «Uiymdasqan top, qylmystyq uiym qurý jáne olarǵa basshylyq etý, sol siiaqty olarǵa qatysý» baptary boiynsha «Vygodnyi zaim» JShS-in quryp, adamdarǵa shyǵyn keltirgen sottalýshylarǵa úkim shyǵardy. Is materialyna súiensek, sottalýshy Aimaǵambetov seriktestikti quryp, oǵan basshylyq etken. Olar avtokólikti qymbatqa satyp berýge ýáde etken. Sonymen birge aqsha salyp, belgili bir ýaqytta joǵary paiyzben keri qaitaryp alý shartyn usynǵan. Eshqandai da kásipkerlik baǵytta damý bolmaǵan. Sóitip 2019 jyldyń 30 qarashasy men 2020 jyldyń aqpany aralyǵynda 800-ge jýyq adamdy aldap soqty. Is boiynsha 6 adamǵa aiyp taǵylyp, elimizdiń úsh oblysynan jábirlenýshiler tirkeldi. Sot otyrysy kezinde sottalýshylar óz kinásin moiyndamady. Qazirgi kezde shyǵyn óndirilmegen.
«Sottalýshy Aimaǵambetovke 10 jylǵa bas bostandyǵynan aiyrý jazasy taǵaiyndaldy. Sonymen birge kommertsiialyq jáne qarjylyq uiymdarda basshylyq qyzmet atqarý quqyǵynan 7 jylǵa aiyryldy. Jazasyn qylmystyq-túzetý júiesiniń qaýipsizdigi meilinshe joǵary mekemesinde óteidi. Al sottalýshylar Abýgaliev, Kýrjimbaev, Taganov, Karasaev, Berniiazovqa 8 jylǵa bas bostandyǵynan aiyrý jazasy taǵaiyndaldy. Olar da kommertsiialyq jáne qarjylyq uiymdarda basshylyq qyzmet atqarý quqyǵynan 7 jyl aiyryldy. Jazasyn qylmystyq-túzetý júiesiniń qaýipsizdigi meilinshe joǵary mekemesinde óteidi. Jábirlenýshilerdiń shyǵyndy óndirý shaǵymy qanaǵattandyryldy», - dedi №2 qalalyq sottyń baspasóz qyzmeti.
Sot úkimi zańdy kúshine engen joq.
