Aqtóbede ýaqytsha qamaý izoliatoryndaǵy 36 jastaǵy turǵynnyń koronavirýs juqtyrǵany anyqtaldy. Odan bólek 32 jastaǵy áiel adam men onyń eki balasynan da virýs tabylǵan. Koronavirýs juqtyrǵan eki balanyń úlkeni - 10-da, kishisi - 5 jasta. Buǵan deiin koronavirýs juqtyrǵan aqtóbelik patsientter arasynda balalar bolǵan emes.
Aqtóbe oblystyq densaýlyq saqtaý basqarmasy basshysy Áset Qalievtiń sózine qaraǵanda 32 jastaǵy áielmen onyń eki balasy virýsty sáýirdiń 15-i kúni infektsiialyq aýrýhanaǵa túsken erli-zaiypty zeinetkerlerden juqtyrǵan.
- Elde karantin rejimi engizilgenine qaramastan áiel adam balalarymen birge ata-anasyna jii baryp turǵan, - deidi Áset Qaliev.
Densaýlyq saqtaý basqarmasynyń basshysy 16 sáýir kúni keshkilik ýaqytsha qamaý izoliatorynan infektsiialyq aýrýhanaǵa jiberilgen azamattyń eki balasy bar áielmen týystyǵy joq ekenin aitady.
- 36 jastaǵy azamattan bólek ýaqytsha qamaý izoliatorynyń 8 qyzmetkeri de oqshaýlandy. Kesheli beri naýqastyń aralasqan adamdary tekserilip jatyr. Onyń ata-anasy osyǵan deiin koronavirýs diagnozymen aýrýhanaǵa túsken aqtóbelikpen kórshi turatyny anyqtaldy, - deidi Áset Qaliev.
Aqtóbe oblysy taýarlar men kórsetiletin qyzmet sapasy men qaýipsizdigin baqylaý departamenti aýrý oshaǵynda epidemiologiialyq zertteý men dezinfektsiia jasalǵanyn aitady. Koronavirýs juqtyrǵany 16 sáýirde belgili bolǵan 4 naýqastyń jaǵdaiy - birqalypty.
Aqtóbe oblysynda koronavirýs juqtyrǵandar sany 18 adam boldy.
