اقتٶبەدە ۋاقىتشا قاماۋ يزولياتورىنداعى 36 جاستاعى تۇرعىننىڭ كوروناۆيرۋس جۇقتىرعانى انىقتالدى. ودان بٶلەك 32 جاستاعى ەيەل ادام مەن ونىڭ ەكٸ بالاسىنان دا ۆيرۋس تابىلعان. كوروناۆيرۋس جۇقتىرعان ەكٸ بالانىڭ ٷلكەنٸ - 10-دا, كٸشٸسٸ - 5 جاستا. بۇعان دەيٸن كوروناۆيرۋس جۇقتىرعان اقتٶبەلٸك پاتسيەنتتەر اراسىندا بالالار بولعان ەمەس.
اقتٶبە وبلىستىق دەنساۋلىق ساقتاۋ باسقارماسى باسشىسى ەسەت قاليەۆتٸڭ سٶزٸنە قاراعاندا 32 جاستاعى ەيەلمەن ونىڭ ەكٸ بالاسى ۆيرۋستى سەۋٸردٸڭ 15-ٸ كٷنٸ ينفەكتسييالىق اۋرۋحاناعا تٷسكەن ەرلٸ-زايىپتى زەينەتكەرلەردەن جۇقتىرعان.
- ەلدە كارانتين رەجيمٸ ەنگٸزٸلگەنٸنە قاراماستان ەيەل ادام بالالارىمەن بٸرگە اتا-اناسىنا جيٸ بارىپ تۇرعان, - دەيدٸ ەسەت قاليەۆ.
دەنساۋلىق ساقتاۋ باسقارماسىنىڭ باسشىسى 16 سەۋٸر كٷنٸ كەشكٸلٸك ۋاقىتشا قاماۋ يزولياتورىنان ينفەكتسييالىق اۋرۋحاناعا جٸبەرٸلگەن ازاماتتىڭ ەكٸ بالاسى بار ەيەلمەن تۋىستىعى جوق ەكەنٸن ايتادى.
- 36 جاستاعى ازاماتتان بٶلەك ۋاقىتشا قاماۋ يزولياتورىنىڭ 8 قىزمەتكەرٸ دە وقشاۋلاندى. كەشەلٸ بەرٸ ناۋقاستىڭ ارالاسقان ادامدارى تەكسەرٸلٸپ جاتىر. ونىڭ اتا-اناسى وسىعان دەيٸن كوروناۆيرۋس دياگنوزىمەن اۋرۋحاناعا تٷسكەن اقتٶبەلٸكپەن كٶرشٸ تۇراتىنى انىقتالدى, - دەيدٸ ەسەت قاليەۆ.
اقتٶبە وبلىسى تاۋارلار مەن كٶرسەتٸلەتٸن قىزمەت ساپاسى مەن قاۋٸپسٸزدٸگٸن باقىلاۋ دەپارتامەنتٸ اۋرۋ وشاعىندا ەپيدەميولوگييالىق زەرتتەۋ مەن دەزينفەكتسييا جاسالعانىن ايتادى. كوروناۆيرۋس جۇقتىرعانى 16 سەۋٸردە بەلگٸلٸ بولعان 4 ناۋقاستىڭ جاعدايى - بٸرقالىپتى.
اقتٶبە وبلىسىندا كوروناۆيرۋس جۇقتىرعاندار سانى 18 ادام بولدى.
