«Aqtóbe oblysynyń kieli jerler geografiiasy» jobasy aiasynda qazba jumystary júrgizilip jatyr. Arheologtar erte temir dáýiri, iaǵni, sarmattar ómir súrgen kezeńge tán qorymdy zerttep, birneshe qundy járiger tapty, dep habarlaidy "Ult aqparat".
Aqtóbe oblysynyń ákimi Ońdasyn Orazalin tarih ǵylymdarynyń doktory, Shyǵys elderi sáýleti halyqaralyq akademiiasynyń korrespondent-múshesi Serik Ájiǵali, tarih ǵylymdarynyń kandidaty, Á.H.Marǵulan atyndaǵy arheologiia institýtynyń bas direktory mindetin atqarýshy Talǵat Mamyrovpen kezdesti. Kezdesý barysynda Aqtóbe oblysynda «Qazaqstannyń kieli jerleri» jobasy aiasynda júzege asyrylyp jatqan ǵylymi-zertteý jobalar talqylandy. Ǵalymdar oblys ákimine Muǵaljar aýdany aýmaǵyndaǵy Jaǵabulaq qorymynan tabylǵan qurban shalatyn oryn men altyn jalatylǵan kórnekti semserdi kórsetti.
«Qorymnyń ózi erte temir dáýirine, iaǵni, b.d.d. VI-V ǵasyrlarǵa jatatyn iri keshen. Munda sondai-aq, qola aina, altyn toǵa jáne t.b. ejelgi zattar tabyldy. Arheologiialyq eskertkishti zertteý jumystary áli de jalǵasyp jatyr. Biyl úsh albom kitap shyǵarylady. «Aqtóbe oblysynyń kieli jerler geografiiasy» atty kitap úsh tilde jaryq kóredi», - dedi Á.H.Marǵulan atyndaǵy arheologiia institýtynyń bas direktory mindetin atqarýshy Talǵat Mamyrov.
Sonymen birge, Qarǵaly aýdanynda qola dáýiriniń qonys-mekenderi tabyldy. Sol aýmaqtan metall pesh tabylǵan. Bul qazirgi Aqtóbe oblysynyń aýmaǵyn qola dáýirinde mekendegen taipalardyń metall óndirisimen ainalysqanyn dáleldeidi.
«Aqtóbe oblysynyń kieli jerler geografiiasy» jobasy aiasynda qazba jumystary júrgizildi. Óńirde el tarihy úshin mańyzdy oqiǵalar bolǵanyn bilemiz. Sol sebepti zertteý mańyzdy. Tarihi, arhitektýralyq, etnografiialyq qundy eskertkishter tek elimizdiń batys óńirine emes, el úshin mańyzdy. Abat Baitaq, Balǵasyn kúmbezi, Dońyztaý. Munyń bári zerttelip, tarihi mańyzy aityldy. Kóp eńbek jaryqqa shyqty. Monografiia da bar. Jumysty jalǵastyryp, kópjyldyq zertteýdiń qorytyndysyn jasap jatyrmyz. Endigi mindet - Dońyztaý aýylyn zertteýdiń úshjyldyq jumysyn aiaqtaý. Elimizdiń eń qashyq aýdany dep aitar edim. Sonymen birge Isatai Taimanuly men Edige batyrdyń jerlengen jerin anyqtaý maqsatynda zertteý júrgiziledi», - dedi tarih ǵylymdarynyń doktory, Shyǵys elderi sáýleti halyqaralyq akademiiasynyń korrespondent-múshesi Serik Ájiǵali.
Kezdesýdi túiindegen oblys ákimi Ońdasyn Orazalin júrgizilip jatqan ǵylymi-zertteý jumystarynyń mańyzdylyǵyn atap ótip, jergilikti atqarýshy organdardyń óńirdiń tarihi-mádeni murasyn zertteýge, saqtaýǵa jáne dáripteýge jan-jaqty qoldaý kórsetýdi jalǵastyratyndaryn aitty.
