Foto: ashyq derekkóz
Aqtóbe oblysynyń qylmystyq ister jónindegi mamandandyrylǵan aýdanaralyq sotynda alqabilerdiń qatysýymen jergilikti dializ ortalyǵynyń aǵa meiirgerge qatysty qylmystyq is qaraldy, dep habarlaidy Ult.kz.
Sot málimetinshe, aiyptalýshy birde áriptesi Abai Aisaǵalievke telefon men bank qosymshalaryn ornatýǵa kómektesken. Sol kezde ol áriptesiniń shottarynda iri kólemde aqsha bar ekenin bilgen.
Aiyptalýshy Aisaǵalievtiń jalǵyz turatynyn paidalanyp, biyl mamyr aiynda onyń úiine barǵan. Aqshasyna ielik etý nietimen ol áriptesine as úi baltasymen ómirine qaýipti jaraqattar salǵan. Keiin denesin tońazytqyshqa jasyrǵan.
Budan soń, aldyn ala satyp alǵan silikondy betperdeni kiip, marqumnyń bank shottarynan 5 268 000 teńge alǵan. Sondai-aq onyń uialy telefondaryn, plansheti men noýtbýgin urlap, jalpy 1 966 860 teńge shyǵyn keltirgen.
Birneshe kúnnen keiin ol ózi kelip, kinásin moiyndaǵan.
Sotta aiyptalýshy kinásin ishinara moiyndady, alaida sot onyń kinási jábirlenýshi taraptyń, kýágerlerdiń aiǵaqtary, saraptama qorytyndylary, beinebaqylaý jazbalary jáne zattai dáleldemeler arqyly tolyq dáleldendi dep tapty.
Alqabilerdiń qatysýymen shyǵarylǵan úkim boiynsha, aiyptalýshy paidakúnemdik maqsatta kisi óltirgeni jáne asa iri kólemde urlyq jasaǵany úshin kináli dep tanyldy.
Sot ony qylmystar jiyntyǵy boiynsha 20 jylǵa bas bostandyǵynan aiyrý jazasyna kesti.
