Q.Jubanov atyndaǵy Aqtóbe óńirlik memlekettik ýniversitetinde «Qazaqstan Respýblikasynyń Tuńǵysh Prezidenti – Elbasy N.Á.Nazarbaevtyń strategiiasy – aimaqtyq damýdyń draiveri» halyqaralyq ǵylymi-tájiribelik konferentsiiasy ótti.
Sharanyń maqsaty – Qazaqstan Respýblikasynyń tuńǵysh Prezidenti – Elbasy N.Á. Nazarbaevtyń Qazaqstannyń aimaqtaryn damytý boiynsha strategiiasynyń mańyzyn kórsetý; sheteldik jáne otandyq sarapshylar qoǵamdastyǵynyń pikirin talqylaý úderisinde aimaqtyq sátti damýdyń faktory retinde Batys Qazaqstannyń ekonomikalyq, áleýmettik-saiasi, rýhani-mádeni áleýetin damytý týraly bilimdi keńeitý.
Konferentsiia jumysyna álemniń 15 memleketinen, sonyń ishinde QHR, Ońtústik Koreia, Túrkiia Respýblikasy, Indiia Respýblikasy, Resei Federatsiiasy, Ózbekstan, Qyrǵyzstan elderinen, sonymen qatar, Qazaqstannyń jiyrma joǵary oqý ornynan kelgen 126 ǵalym qatysty.
- Aqtóbede Prezident Nursultan Nazarbaevtyń Táýelsiz Qazaqstannyń qalyptasýy men órkendeýindegi róli týraly konferentsiia ótkizý biz úshin úlken qýanysh ári qurmet. Jýyrda biz Táýelsizdigimizdiń 27 jyldyǵyn atap ótemiz. Qazaqstan osyndai qysqa tarihi kezeń ishinde Ult kóshbasshysynyń dana saiasatynyń arqasynda búkil álemge tanyldy. Konferentsiiaǵa qatysýshylardyń barlyǵy ózderi úshin jańa dúnielerdi ashady dep senemin. Shynynda, pikir almasý, pikirtalastar men dialog barysynda jaqsy ideialar paida bolady, - dedi Aqtóbe oblysynyń ákimi Berdibek Saparbaev sálemdesý sózinde.
Óńir basshysy sondai-aq, aqtóbelik jastardy ulttyq salt-dástúrdi saqtap, zamanaýi joǵary bilim alýǵa, básekelestikke qabiletti maman jáne Otanynyń patrioty bolýǵa shaqyrdy.
Elbasy kitaphanasy direktorynyń birinshi orynbasary, saiasi ǵylymdarynyń doktory, professor Ámirhan Rahymjanov «Prezident Nursultan Nazarbaevtyń Qazaqstan óńirleriniń damýy jónindegi strategiiasy» taqyrybynda baiandama jasady.
- Tarihi úderistiń turǵysynan alǵanda, 27 jyl qysqa ýaqyt kezeńi bolyp tabylady, biraq eldiń saiasi, ekonomikalyq jáne áleýmettik salalaryndaǵy ózgerister qarqynynyń óskeni sonshalyq, bul ózgeristerdiń aýqymy 90-jyldardyń basynda jas memlekettiń alǵashqy qadamdaryna kýá bolǵan adamdardy tań qaldyrmai qoimaidy. Prezident júrgizip otyrǵan saiasattyń negizgi postýlaty árqashan eldegi beibitshilik pen kelisimdi saqtaý boldy. Alǵashqy kúnderden bastap reformalardyń áleýmettik baǵdarlanýyna basa nazar aýdaryldy. Memleket basshysyna sheshimderdi ýaqytyly qabyldaýǵa, ýaqyttyń qiyndyqtaryna jaýap berýge, jaǵdaidy óte qiyn kezde túzetýge týra keldi. Sonymen birge Nursultan Nazarbaev árqashan jaýapkershilikti ózine aldy, - dedi professor.
Óz sózinde ol konferentsiiany Qazaqstan elordasynyń 20 jyldyǵyn merekeleý jyly ótkizýdiń simvoldyǵyn atap ótti.
- Astana jiyrma jyl ishinde táýelsiz Qazaqstannyń tabysy men gúldenýiniń nyshanyna ainaldy. Osy múmkindikti paidalana otyryp, elorda turǵyny retinde aqtóbelikterge astana mereitoiyna tartý etken biregei syilyq - «Beibitshilik qabyrǵasy» eskertkishi úshin alǵys aitamyn. Onyń ashylý rásimi halyqaralyq iadrolyq synaqqa qarsy áreket kúni ótti. Memleket basshysy Astanada ornatylǵan biregei eskertkishtiń tarihymyzdyń sabaqtaryn bilip, este saqtaýǵa, bizdiń óz jerimizde qurǵan beibitshilik pen igilikti qurmetteýge shaqyrý bolyp tabylatynyn atap ótti. «Beibitshilik qabyrǵasy» - bul zamandastarǵa beibitshilik qundylyqtary men ótkenniń qaiǵyly betteriniń qaitalanýyna jol bermeý týraly taǵy bir eskertý. 11 qazanda álemdik jáne dástúrli dinder kóshbasshylarynyń 6-shy sezi aiasynda «beibitshilik» sózi 51 tilde jazylǵan «Beibitshilik qabyrǵasynda» túrli din ókilderi osy jerdegi beibitshilik pen kelisim úshin qasietti duǵalaryn oqydy,- deidi Ámirhan Rahymjanov .
Konferentsiiaǵa qatysýshylar Qazaqstan aimaqtaryn damytý boiynsha N.Á.Nazarbaev strategiiasynyń mánmátininde álemdik qoǵamdastyqtaǵy Qazaqstannyń bedeli men halyqaralyq mártebesin arttyrý faktory retinde Tuńǵysh Prezident – Elbasynyń ishki saiasi bastamalary men etnikaaralyq, konfessiiaaralyq kelisim men rýhani damý, «Prezidenttiń bes áleýmettik bastamasy» jobasy, Memleket basshysynyń «Bolashaqqa baǵdar: qoǵamdyq sanany jańǵyrtý» baǵdarlamalyq maqalasyn júzege asyrý salasyndaǵy ǵylymi zertteýler nátijesin talqylady.
Is-shara Qazaqstan Respýblikasynyń Tuńǵysh Prezidenti – Elbasy kitaphanasynyń «N. Nazarbaev: dáýir, tulǵa, qoǵam» kóshpeli kórme jobasy aiasynda ótkizildi. Joba boiynsha aýqymdy ǵylymi-bilim berý jáne mádeni-aǵartý sharalary, sonymen qatar Aqtóbeoblysy boiynsha kóshpeli ekskýrsiialar uiymdastyrylady. Joba Elbasy kitaphanasynyń jinaqtarynan usynylǵan qor kórmesine negizdelgen. Kórme 14 qarashadan bastap Aqtóbe oblystyq tarihi-ólketaný murajaiynyń jańa ǵimaratynda eksponattalýda. Aqtóbeturǵyndary men qonaqtary 2019 jylǵy qańtar aiynyń sońyna deiin kórmeni tegin tamashalai alady.
