Foto: ashyq internet kózderinen
Aqtóbe sotynda jas dáriger Móldir Tomarovanyń ólimine qatysty jabyq qaralǵan asa aýyr qylmystyq oqiǵa boiynsha sot úkimi shyqty. 34 jastaǵy er adamǵa Qylmystyq kodekstiń tórt birdei babymen taǵylǵan aiyp sotta dálelin tapty. Bul týraly NUR.KZ saity habarlady.
Basylym tilshileriniń mádimetinshe, búgin Aqtóbe oblystyq qylmystyq ister jónindegi mamandandyrylǵan aýdanaralyq sotynda jas dáriger Móldir Tomarovanyń ólimine qatysty sot úkimi shyqty. Is alty tomdyq, tórt kýáger bar.
Sottalýshyǵa Qylmystyq kodekstiń 149-babynyń 2-tarmaǵy "Turǵynjaiǵa qolsuǵylmaýshylyqty buzý", 120-bap 2-tarmaq 2-bóligi "Zorlaý", 99-bap 2-tarmaq "Adam óltirý" jáne 380-bap 1-tarmaq "Bilik ókiline qatysty qorqytý nemese kúsh kórsetý áreketteri" boiynsha aiyp taǵylǵan edi.
Sot sheshimimen ol 22 jylǵa bas bostandyǵynan aiyryldy. Jaza óteý orny qaýipsizdigi ortasha mekeme dep belgilendi. Sebebin sýdia sottalýshynyń buryn isti bolmaýymen túsindirdi.
"E. kinási tolyq dáleldendi dep eseptelinedi. Qylmysty jasyrý úshin Tomarovany qasaqana óltirgen. Kúsh qoldanyp, zorlaǵan. Turǵyn jaiǵa túnde basyp kirgen. Oqiǵa ornynan balkon arqyly qashyp shyǵyp, politsiia qyzmetkerin jaraqattap qashyp ketken. Sotta tolyǵymen dálelin tapty. Ol páterge kirgenin, pyshaq jaraqatyn salyp óltirgenin moiyndap otyr. Jábirlenýshimen tanystyǵy 2017 jyldan bastalǵan. Sońǵy kezderi Tomarova qashqaqtai bastaǵan, syilyqtaryn qaitaryp bergen. Politsiiaǵa aryz jazyp, ákimshilik jazaǵa tartylǵan. Oqiǵa túngi 4-te bastalǵan. Arnaiy saty aparǵan, óz kóligimen emes, basqa kólik jaldaǵan. Ishke kirip, zorlap, sony jasyrý úshin óltirgen. Sot buryn sottalmaǵanyn eskerdi. Aýyrlatatyn mán-jai anyqtalmady", - dedi sýdia Nurlan Baqtyǵaliev.
Sottalýshydan jábirlenýshi tarapqa 20 mln teńge kóleminde moraldyq shyǵyn jáne janazasy, sadaqasyna jumsalǵan 1 mln 230 myń teńge, 800 myń teńge advokat shyǵyny men ata-anasynyń Qyzylordadan Aqtóbege qatynaý jolaqysyn óndirý mindetteldi. Sot otyrysyna dárigerdiń ata-anasy qatysty.
"Úkimge kóńilim tolyp turǵan joq. Ómir boiyna bas bostandyǵynan aiyrý jazasyn suradyq. Apelliatsiialyq shaǵym túsirýimiz múmkin. Qyzymdy 24 jerden pyshaqtap óltirip, asa aýyr qylmys jasady. Bizdiń otbasymyzǵa orny tolmas qaiǵy ákeldi. Sol kúni ǵana keshkilik qyzymmen sóilesken edim. Bulai bolaryn kim bilgen", - dedi marqumnyń ákesi Qaldybai Tomarov.
Marqumnyń anasy qyzy týraly aitý qiyn ekenin aityp únsiz jylady.
Eske sala keteiik, Móldir Tomarova – Qyzylorda oblysynyń týmasy. Aqtóbe meditsina ortalyǵynyń endokrinolog-dárigeri bolyp qyzmet etti. Ol Aqtóbe qalasyndaǵy meditsinalyq ýniversitette 9 jyl bilim alǵan. Aita keteiik, qaiǵyly oqiǵa biyl 22 sáýirde boldy.
