Aqtóbe oblysy Shalqar qalasynda bolǵan tóbelesten keiin mektep oqýshysy kóz jumdy. Aldyn ala málimet boiynsha, ony jasóspirim jaraqattaǵan.
Eki aýdannyń balalary senbi kúni muz aidyny ashylǵan Shalqar kólinde tóbeles shyǵardy, dep jazady óńirlik "Diapazon" basylymy. Osy kezde mektep oqýshylarynyń birin aiaǵynan pyshaqpen jaraqattaǵan.
"Jasóspirim aýdandyq aýrýhananyń jansaqtaý bóliminde kóz jumdy. Bizdegi málimet boiynsha, bul qorǵaný áreketi boldy. Qazir bolǵan jaǵdaiǵa bailanysty kúdikke ilinip otyrǵan onynshy synyp oqýshysy fýtbolmen, basketbolmen ainalysady, ózi jaqsy oqidy", — dedi №6 mektep direktorynyń qyzmetin atqarýshy Áliia Ospanova.
Marqum jasóspirim bokspen ainalysqan. Shalqarǵa kóship kelgenge dein Aqtóbedegi sporttyq sheberlik mektebinde bilim alǵan.
Oblystyq politsiia departamenti ázirge bolǵan jaǵdaiǵa qatysty esh málimet bermedi.
Áliia Ospanovanyń aitýynsha, ata-analar kópshilik demalatyn oryndarda politsiia qyzmetkerleriniń kezekshiligin uiymdastyrýdy surap otyr. Ol jýyrda muz aidynynda qulaǵan 11-synyp oqýshysynyń qulaǵyn konkimen baiqamai kesip ketkenin aitty.
Aita ketsek, ishki ister ministrligi jasóspirimder isi jónindegi komitettiń shuǵyl otyrysyn ótkizýdi usyndy. Buǵan jasóspirimder arasynda tóbelestiń kóbeiip ketýi sebep. Qańtar aiynda Túrkistan oblysynda joǵary synyp oqýshylary ózderinen kishi balalardy tizerletip otyrǵyzyp, basynan urǵan. Al Qaraǵandyda pitstseriiada oryn bergisi kelmegen 11 jasar balanyń soqqyǵa jyǵylǵany belgili boldy. Sondai-aq, politsiia Qyzylordada bir jyl buryn qatarlasyn dárethanada uryp-soqqan oqýshylardy qolǵa túsirdi.
