Aqtóbe politsiiasy oblystyq máslihat depýtatyna qatysty qylmystyq isti tergep jatyr. Al jábirlenýshi qyz qorǵaýǵa alyndy, dep habarlaidy "Ult aqparat".
Aqtóbe oblystyq máslihatynyń depýtaty kámelet jasyna tolmaǵan qyzben jynystyq qarym-qatynasqa tústi degen kúdikke ilikti. Bul týraly birqatar áleýmettik jeli paraqshasynda jariialandy. Politsiia bul iske qatysty túsinik berdi.
«Aqtóbe oblysynyń politsiia departamenti jeke tulǵaǵa qarsy qylmystyq quqyqbuzýshylyq jasaǵany úshin Aqtóbe qalasynyń turǵynyna qatysty qylmystyq isti tergep jatyr. Qazirgi ýaqytta kúdikti QR Qylmystyq-protsestik kodeksi 128-babynyń tártibimen Aqtóbe qalasynyń ýaqytsha ustaý izoliatoryna qamaldy. QR Qylmystyq-protsestik kodeksiniń 201-babyna sáikes ózge aqparat jariialanbaidy», - dep habarlady oblystyq PD baspasóz qyzmeti.
Al oblystyq bilim basqarmasy kámelet jasyna tolmaǵan qyzdyń janynda psihologtar jumys istep jatqanyn aitty.
«Keshe keleńsiz oqiǵanyń tirkelgeni ras. Qazir qylmystyq is boiynsha tergeý júrip jatyr. Jábirlenýshi kámelet jasyna tolmaǵan. Sondyqtan biz oqiǵany jariia ete almaimyz. Oqýshy qaýipsiz jerge, iaǵni, arnaiy mekemege ornalastyryldy. Janynda tárbie isi jónindegi maman, psiholog, ishki ister organdarynyń ókili bar. Eshqandai psihologiialyq aýytqýy joq. Tolyq emes otbasynda tárbielengen», - deidi oblystyq bilim basqarmasynyń bólim basshysy Raihan Nurqojaeva.
Buǵan deiin habarlaǵanymyzdai, Aqtóbe oblysy máslihatynyń depýtaty Arkadii Ni zańǵa qarsy áreket jasady degen kúdikpen ustaldy.
