Aqtóbe oblysynyń Pokrovka-Jańajol baǵytyndaǵy jolda avtobýs pen júk kóligi soqtyǵysyp, eki adam kóz jumdy, dep habarlaidy QazAqparat.
«17 jeltoqsan kúni saǵat 18:45-te munai kompaniiasyna tiesili «PAZ« markaly avtokóliginiń 59 jastaǵy júrgizýshisi Jarqamys aýylynan Aqtóbe qalasyna baǵyt alǵan. Pokrovka-Jańajol avtojolynyń 13-shaqyrymynda kedergi men qaýip týyndaǵanda ol jyldamdyqty tómendetpei, jol boiynda turǵan «KamAZ« markaly kólikpen soqtyǵysty», - dedi oblystyq Politsiia departamenti baspasóz qyzmetiniń jetekshisi Erbolat Sarqulov.
Jol-kólik apaty saldarynan eki jolaýshy oqiǵa ornynda kóz jumyp, úsheýi Qandyaǵash qalasynyń ortalyq aýrýhanasyna túrli jaraqatpen jatqyzyldy. Qazir tergeý júrip jatyr.
