Aqtóbede munai urlyǵy isi boiynsha taǵy 7 adam qamaýǵa alyndy, - dep habarlaidy "Ult aqparat" kaz.tengrinews.kz portalyna silteme jasap.
"Aqtóbe qalalyq №2 sotyna arnaiy operatsiia kezinde ustalǵan B.K.Batyrov, N.S.Qazkenov, S.B.Dýsýpov, E.Ý.Erketaev , A.A.Amitov, J.M.Iliiasov, A.M.Qaliev, A.J.Sársenov jáne Erkin Izbasarǵa (1-shi toptaǵy múgedek) qatysty bultartpaý sharasy retinde qamaýǵa alý týraly ótinish kelip tústi", - delingen habarlamada.
Bul tulǵalarǵa QR Qylmystyq kodeksiniń 197-babynyń 4-bóligi 1,2-tarmaqtary ("Munaidyń jáne munai ónimderiniń shyǵarylý zańdylyǵyn rastaityn qujattarsyz olardy tasymaldaý, iemdený, ótkizý, saqtaý, sondai-aq munaidy qaita óńdeý") jáne 262-babynyń 2-bóligi ("Uiymdasqan top, qylmystyq uiym qurý jáne olarǵa basshylyq etý, sol siiaqty olarǵa qatysý") boiynsha kúdik kelip otyr.
Qamaýǵa alynǵandardyń ishinde "Aǵaiyndy tórteý" qylmystyq tobynyń jetekshisi Erkin Izbasar da bar.
"Sottyń qaýlysymen B.K.Batyrovqa, N.S.Qazkenovqa, S.B.Dýsýpovqa, E.Ý.Erketaevqa, A.A.Amitovqa, J.M.Iliiasovqa, A.M.Qalievqa jáne E.J.Izbasarǵa qatysty eki aiǵa qamaýǵa alý týraly ótinishi qanaǵattandyryldy", - dep habarlady sottaǵylar.
Eske sala keteiik, Erkin Izbasar Aqtóbedegi munai bazasynyń territoriiasynda iri arnaiy operatsiia júrgen kúni Almatyda ustalǵan bolatyn. Uiymdasqan qylmystyq toptyń liderimen birge onyń oqqaǵary men júrgizýshisi ustalǵan edi. Al keiinirek munai urlaýmen ainalysqan qylmystyq toptyń jetekshisi Aqtóbege UQK ushaǵymen jetkizilgen bolatyn. Erkin Izbasarovpen birge onyń kólik júrgizýshisi men oqqaǵary da qazir Aqtóbede. Endi olardy munai urlyǵyna qatysty osynda tergeitin bolady. Izbasarovtiń aimaqtaǵy jat aǵymnyń jeteginde ketken jigitterdi óz paidasyna jumsap otyrǵany belgili bolyp otyr.
