Dúisenbide Aqtóbe soty mekteptegi oramal daýynan týyndaǵan azamattyq isti qarai bastady. Shaǵymdanýshy Qairat Jarmaǵambet Aqtóbedegi №10 mekteptiń segizinshi jáne toǵyzynshy synyptarynda oqityn eki qyzyn mektep direktory Gúlaiym Imanovanyń qańtardyń 8-inen beri sabaqqa kirgizbei otyrǵanyn aityp, sottan onyń isin zańsyz dep tanýdy surady.
- Mektep direktory Gúlaiym Imanova qyzmet babyn asyra paidalanyp, qyzdaryma qysym jasap otyr. Balalarymnyń el konstitýtsiiasynda bekitilgen bilim alý quqyn shektedi. Mektep formasyna dini atribýttardy qosty dep aiyptady. Qyzdarymnyń basyndaǵy aq oramaldyń dinge qatysy joq. Bul - babalar dástúri, - dedi Qairat Jarmaǵambet sot zalynda.
Sotqa qalalyq jáne oblystyq bilim basqarmalarynyń ókilderin erte kelgen Aqtóbedegi №10 mektep direktory Gúlaiym Imanova Qairat Jarmaǵambettiń otbasynan eki oqýshynyń úshinshi toqsannan bastap sabaqqa jiberilmegenin rastady. Gúlaiym Imanovanyń aitýynsha, oqýshy qyzdar san márte eskertý jasalǵanyna qaramastan oramaldaryn sheshpei qoiǵan.
Sotqa sarapshy retinde shaqyrylǵan Aqtóbedegi bilim sapasyn baqylaý departamentiniń bas mamany Erbol Erbolatulynyń aitýynsha, bala mektep formasyna qoiylatyn talapty oryndamaǵan jaǵdaida ata-ana ákimshilik jaýapqa tartylady. Osyndai oramal daýyna orai jýyrda Shalqar qalasynyń turǵyndaryna aiyppul salynǵan.
Al Shalqar qalasyndaǵy №5 mektep-litseide segizinshi jáne onynshy synybynda qyzdary oqityn Erbolat Turǵanbaev Azattyqqa qyzdary mektepke oramalmen baryp júrgen úsh otbasyna 12025 teńgeden aiyppul salynǵanyn rastady. Erbolat Turǵanbaevtyń aitýynsha, aiyppulmen kelispeitin ata-analar sotqa shaǵymdanbaq.
Aqtóbe oblystyq din isteri departamentiniń basshysy Joldas Qalmaǵambetovtiń sózine qaraǵanda, oqý jylynyń úshinshi toqsany bastalǵaly oblysta oramal tartatyn 200-den astam qyz bala mektepke bara almai otyr.
