دٷيسەنبٸدە اقتٶبە سوتى مەكتەپتەگٸ ورامال داۋىنان تۋىنداعان ازاماتتىق ٸستٸ قاراي باستادى. شاعىمدانۋشى قايرات جارماعامبەت اقتٶبەدەگٸ №10 مەكتەپتٸڭ سەگٸزٸنشٸ جەنە توعىزىنشى سىنىپتارىندا وقيتىن ەكٸ قىزىن مەكتەپ ديرەكتورى گٷلايىم يمانوۆانىڭ قاڭتاردىڭ 8-ٸنەن بەرٸ ساباققا كٸرگٸزبەي وتىرعانىن ايتىپ, سوتتان ونىڭ ٸسٸن زاڭسىز دەپ تانۋدى سۇرادى.
- مەكتەپ ديرەكتورى گٷلايىم يمانوۆا قىزمەت بابىن اسىرا پايدالانىپ, قىزدارىما قىسىم جاساپ وتىر. بالالارىمنىڭ ەل كونستيتۋتسيياسىندا بەكٸتٸلگەن بٸلٸم الۋ قۇقىن شەكتەدٸ. مەكتەپ فورماسىنا دٸني اتريبۋتتاردى قوستى دەپ ايىپتادى. قىزدارىمنىڭ باسىنداعى اق ورامالدىڭ دٸنگە قاتىسى جوق. بۇل - بابالار دەستٷرٸ, - دەدٸ قايرات جارماعامبەت سوت زالىندا.
سوتقا قالالىق جەنە وبلىستىق بٸلٸم باسقارمالارىنىڭ ٶكٸلدەرٸن ەرتە كەلگەن اقتٶبەدەگٸ №10 مەكتەپ ديرەكتورى گٷلايىم يمانوۆا قايرات جارماعامبەتتٸڭ وتباسىنان ەكٸ وقۋشىنىڭ ٷشٸنشٸ توقساننان باستاپ ساباققا جٸبەرٸلمەگەنٸن راستادى. گٷلايىم يمانوۆانىڭ ايتۋىنشا, وقۋشى قىزدار سان مەرتە ەسكەرتۋ جاسالعانىنا قاراماستان ورامالدارىن شەشپەي قويعان.
سوتقا ساراپشى رەتٸندە شاقىرىلعان اقتٶبەدەگٸ بٸلٸم ساپاسىن باقىلاۋ دەپارتامەنتٸنٸڭ باس مامانى ەربول ەربولاتۇلىنىڭ ايتۋىنشا, بالا مەكتەپ فورماسىنا قويىلاتىن تالاپتى ورىنداماعان جاعدايدا اتا-انا ەكٸمشٸلٸك جاۋاپقا تارتىلادى. وسىنداي ورامال داۋىنا وراي جۋىردا شالقار قالاسىنىڭ تۇرعىندارىنا ايىپپۇل سالىنعان.
ال شالقار قالاسىنداعى №5 مەكتەپ-ليتسەيدە سەگٸزٸنشٸ جەنە ونىنشى سىنىبىندا قىزدارى وقيتىن ەربولات تۇرعانباەۆ ازاتتىققا قىزدارى مەكتەپكە ورامالمەن بارىپ جٷرگەن ٷش وتباسىنا 12025 تەڭگەدەن ايىپپۇل سالىنعانىن راستادى. ەربولات تۇرعانباەۆتىڭ ايتۋىنشا, ايىپپۇلمەن كەلٸسپەيتٸن اتا-انالار سوتقا شاعىمدانباق.
اقتٶبە وبلىستىق دٸن ٸستەرٸ دەپارتامەنتٸنٸڭ باسشىسى جولداس قالماعامبەتوۆتٸڭ سٶزٸنە قاراعاندا, وقۋ جىلىنىڭ ٷشٸنشٸ توقسانى باستالعالى وبلىستا ورامال تارتاتىن 200-دەن استام قىز بالا مەكتەپكە بارا الماي وتىر.
