Eki kún boiy Aqtóbe qalasyn qoqys poligonynan shyqqan tútin basyp, ekologtar aýaǵa azot dioksidiniń kóterilgenin anyqtady, dep habarlaidy QazAqparat.
Aqtóbede 24 qazan kúni qoqys poligony órtenip, ol 25 qazanda tańerteń sóndirilgen bolatyn. Aýmaǵy 1200 sharshy metrdi qurady. Saldarynan qala ishin tútin basyp, oblystyq Tótenshe jaǵdailar departamenti qala turǵyndary men qonaqtaryn qaýipsizdikti saqtaýǵa jáne asa qajet bolmasa dalaǵa shyqpaýǵa shaqyrǵan edi.
Ekologtar aýanyń lastanýyn tekserdi.
«24 qazan kúni habarlama keldi. 24-25 qazanda inspektorlar qoqys poligonyna baryp, jumys istedi. Kómirsýrektiń kóterilgeni anyqtalmady. Degenmen sol aýmaqta azot dioksidi kóterilgen. Al Aqtóbe qalasyna kómirsýtek pen azot dioksidiniń taralýy tirkelgen joq», - dedi Aqtóbe oblysy boiynsha bas ekologiia inspektory Talap Ýsnadin.
Aita keteiik, moratoriige bailanysty kásiporyndy tekserýge múmkindik joq. Sebebi turǵyndardan eshqandai aryz-shaǵym túspegen.
«Oblystyq Ekologiia departamentine aryz túspegen soń, biz dál qazir tekserý jumystaryn júrgize almaimyz. Biraq oblystyq TJD-niń tekserý jumystarynyń nátijesin kútip otyrmyz. Olardyń qorytyndysy shyqqan soń qandai sheshim qabyldaitynymyz belgili bolady. Zań boiynsha olar aýany lastaǵany úshin ákimshilik jaýapqa tartylady», - dedi Talap Ýsnadin.
