Búgin Aqtóbede "oramal daýyna" qatysy bar taraptar "dóńgelek ústel" basyna jinalyp, qalyptasyp otyrǵan máseleni sheshýdiń joldaryn talqylady. Oblys ákimdiginiń uiymdastyrýymen "Nur Otan" partiiasy Aqtóbe filialynyń ǵimaratynda ótken jiynǵa "oramal daýyna" bailanysty balalary mektepke kire almai júrgen ata-analar, sheneýnikter men zańgerler – barlyǵy qyryqtan astam adam qatysty, - dep jazady Azattyq.
Jiynda ózin Dáýletkerei Názenovpin dep tanystyrǵan azamat Aqtóbede "oramal daýyna" qatysy bar turǵyndarǵa "jan-jaqty qysym jasalyp jatyr" dep málimdedi.
- Balalary mektepke kire almai otyrǵan otbasylardy quramynda ishki saiasat bólimi qyzmetkerleri, politsiia ókilderi men mektep muǵalimderi bar delegatsiialar aralap júr. "Balalaryńyz oramaldaryn sheshsin, áitpese sizder túrli qiyndyqqa tap bolasyzdar. Ata-analyq quqyqtaryńyzdan aiyramyz, aiyppul salamyz" dep qorqytady. Oramal tartatyn balalardyń ata-analaryna psihologiialyq qysym jasalyp jatyr. Bul - naǵyz repressiia, - dedi Dáýletkerei Názenov.
Aqtóbe oblysy ákiminiń orynbasary Erbol Nurǵaliev memlekettik organdar ókilderi zań aiasynda áreket etip jatyr dep jaýap berdi.
- Mektep direktorlary – zańnyń oryndalýyn qadaǵalap otyrǵan kisiler. Aqtóbe oblysyndaǵy 135 myń oqýshynyń 177-siniń sabaqqa kelmei otyrǵany bilikti de qatty alańdatyp otyr, - dedi Nurǵaliev.
Jiynda sóz alǵan ata-analar joǵarǵy synyptaǵy oramal taǵatyn balalaryn onlain arqyly qashyqtan oqytý jáne qyz balalarǵa arnalǵan mektep-medrese ashý týraly ótinishteriniń júzege asýyna joǵary jaqtaǵylar járdem jasasa degen tilekterin bildirdi. Ata-analardyń oramal daýyna qatysty usynystaryn tyńdaǵannan keiin oblys ákiminiń orynbasary Erbol Nurǵaliev talap-tilekterdi oblys basshylyǵy men Astanadaǵy tiisti ministrlikterge jetkizýge ýáde etti.
Eki jarym saǵatqa sozylǵan jiyn sońynda taraptar ortaq mámilege kelgen joq. Aqtóbe oblysy ákiminiń orynbasary Erbol Nurǵaliev aldaǵy aptada osyndai taǵy bir jiyn ótetinin habarlady.
Aqtóbe oblystyq bilim basqarmasynyń dereginshe, qazir oblysta "oramal daýyna" bailanysty mektepke sabaqqa kire almai otyrǵan 177 oqýshy bar. Oblystyq din isteri basqarmasynyń basshysy Joldas Qalmaǵambetov álgi balalardyń 130-y – "baliǵat jasyna jetpegen", iaǵni tómengi synyp oqýshylary ekenin aitady.
