Foto: ashyq derekkóz
Aqtóbe oblysy boiynsha Ekonomikalyq tergeý departamentimen «Harmony Rider Technology» (HRT) investitsiialyq joba retinde jasyrylǵan qarjy piramidasynyń qyzmeti toqtatyldy, dep habarlaidy Ult.kz.
Ózin elektrosamokattardy jalǵa berýmen ainalysatyn amerikalyq kompaniia retinde tanystyrǵan bul uiym azamattarǵa kún saiyn 12-den 690 AQSh dollaryna deiin tabys tabýdy ýáde etken.
Sondai-aq, jańa investorlardy tartqany úshin kriptovaliýta túrinde bonýstar usynylǵan. Alaida is júzinde tólemder jańa salymshylardyń qarajatynan júzege asyrylyp otyrǵan, bul qarjy piramidasynyń aiqyn belgilerin kórsetedi.
Alaiaqtyq shema saldarynan 100-den astam adam zardap shekti. Tartylǵan qarajattyń jalpy somasy 197 mln teńgeni qurady. Urlanǵan aqsha kriptovaliýta ámiiandaryna, sodan keiin jeke bank shottaryna aýdarylǵan.
Qylmystyq is aiasynda 70 mln teńgeden astam somaǵa múlikke tyiym salyndy. Tergeý aiaqtalyp, qylmystyq is sotqa joldandy.
