Aqtóbede politsiia kólikterdi jappai tekserip jatyr. Eki saǵatta 50 kólik avtoturaqqa qoiyldy, dep habarlaidy "Ult aqparat".
«Iri óndiris oryndary óz jumysshylarynyń kóligin ákimdik arqyly «Sergek» baǵdarlamasyna tirkeýi qajet edi. Onda adamdardyń jumys ýaqyty, kúnderi anyq jazylýy tiis. Búgin tańerteń kólik ielerin jappai tekserý bastaldy. Eki saǵatta 50-den astam adam ákimshilik jaýapqa tartylyp, kóligi arnaiy turaqqa qoiyldy. Olarda anyqtama qujaty bolmady, sonymen birge kásiporyn basshylary jumysshylarynyń qaýipsizdigine selsoq qaraǵan. Sonyń ishinde kommýnaldyq mekemeler men azyq-túlik, dári-dármek tasymaldaýshylar da bar», - dedi oblystyq jergilikti politsiia qyzmetiniń bólim bastyǵy Aidos Quljanov.
Aita keteiik, óńirde barlyǵy 600-den astam quqyqbuzýshylyq tirkeldi. Ákimshilik quqyq buzý týraly kodekstiń «Tótenshe jaǵdai rejimin buzý» baby boiynsha 138 adam qamaldy.
Sonymen birge 200-ge jýyq adamǵa aiyppul salyndy. Beibereket kóshede júrgen adamdardyń kóbine eskertý berildi. Al «Tótenshe jaǵdaida quqyq tártibin buzýǵa itermeleitin is-áreketter» baby boiynsha 12 adam qamalǵan. Sotqa jiberilgen materialdar da bar.
Politsiia blokpostty ainalyp ótpek bolǵan adamdardy áli anyqtap jatyr. Óńirde 31 derek tirkelgen. Politsiia qala turǵyndaryna el ishindegi shekteýlerdi qatań saqtaýǵa, úide otyrýǵa keńes beredi.
