Aqtóbe qalasynda grek-rim kúresinen el birinshiligi bastaldy. Úsh kúnge josparlanǵan chempionatqa Nur-Sultan, Almaty, Shymkent qalalary jáne 14 oblystan 200-den astam boz kilem sheberi qatysýda, dep habarlaidy "Ult aqparat".
Jekpe-jek saraiynda 10 salmaq boiynsha palýandar ózara myqtyny anyqtaidy. Jeńimpazdar ulttyq quramaǵa alynady jáne álem, Aziia chempionatyna qatysýǵa múmkindik alady.
«Sportshylardyń arasynda álemdik boz kilemde kúresip júrgen palýandar baryn eskersek, biylǵy el birinshiligi tartysty ótpek. Pandemiiaǵa bailanysty sanitarlyq talapqa sai jarys kórermendersiz ótip jatyr. Alaida chempionatty YouTube kanalynan, @aqtobe_obl_sport áleýmettik jelide tikelei efirde tamashalai alady. Atalmysh doda QR Táýelsizdiginiń 30 jyldyǵy men Qajymuqan Muńaitpasulynyń 150 jyldyǵyna orailastyrylǵan», - dedi oblystyq dene shynyqtyrý jáne sport basqarmasy baspasóz qyzmetiniń jetekshisi Erlan Muqan.
Aita keteiik, Aqtóbe oblysynyń quramasy úzdikterden jasaqtalǵan. Qurama sapynda 60 kelige deiingi salmaqta V jazǵy spartakiadanyń júldegeri Nurbolat Temirbaev, 63 kelide Kadetter arasynda Aziia chempionattarynyń jeńimpazdary Ádil Sisenbaev, 77 kelige deiingi salmaqta Aziia chempiony Dáýlet Jalǵasov bar. Úzdik úshtikke engen aqtóbelik sportshylar jyl boiy jergilikti biýdjetten qomaqty shákirtaqy ala alady. Naýryz aiynyń basynda Italiia astanasynda Qazaqstan ulttyq quramasynyń qatysýymen halyqaralyq reitingtik týrnir ótedi. Onda 63 kelige deiingi salmaqta jergilikti grek-rimdikterdiń tanymal kóshbasshysy, eńbek sińirgen sport sheberi Meirambek Ainaǵulov óner kórsetedi.
