"Damý" qorynyń Aqtóbe filialyndaǵy ǵimaratynda shatyr men ekinshi qabat qulady. "Aýyl sharýashylyǵyn qarjylai qoldaý qory" filialynyń qyzmetkeri aýyr jaraqat aldy. Onyń jaǵdaiy aýyr, - dep habarlaidy Tengrinews.kz.
Aqtóbe oblysy Densaýlyq saqtaý basqarmasynyń basshysy Rústem Isaevtyń aitýynsha, qazirgi ýaqytta 1988 jyly týǵan M. esimdi zardap shegýshi aýyr halde jansaqtaý bóliminde jatyr.
"Onyń birneshe qabyrǵasy synǵan, jabyq mi jaraqaty bar. Dárigerler ony qalpyna keltirý úshin qoldan kelgenniń bárin jasap jatyr", - dep túsindirdi Rústem Isaev.
TJD baspasóz qyzmetiniń málimeti boiynsha, keshe 19 saǵat 25 minýtta ekinshi qabat pen shatyr qulaǵany týraly habarlama túsken. Tótenshe jaǵdai ornyna qutqarýshylar dereý jetti. Tas pen qoqys astynan 5 adam shyǵaryldy.
"Shatyr men qabyrǵanyń qulaý sebebin mamandar anyqtaidy. Istiń barlyq materialy politsiiaǵa tapsyryldy", - deidi Aqtóbe oblystyq TJD baspasóz hatshysy Gúljanat Naǵimetova. Sondai-aq, PD baspasóz qyzmeti ókili QR QK 156-baby 2-bóligi boiynsha qylmystyq is qozǵalǵanyn habarlady.
"Qulaǵannan keiin ǵimarat aýmaǵyn bizdiń qyzmetkerler qorshady, oqiǵa ornynda aldyn ala tekserý júrgizildi, nátijesinde 156-bap, 2-bólim boiynsha qylmystyq is qozǵaldy", - dedi oblystyq PD baspasóz qyzmetiniń basshysy Erbolat Sarqulov.
Aita keteiik, bul apat ǵimaratty jalǵa alǵan birneshe iri uiymnyń jumysyna da kedergi keltirdi. Ǵimaratta "Damý" jáne AShQQQ-dan basqa, bul "QazAgroQarjy" AQ filialy, "Alǵa KT" JShS, sondai-aq jeke notariýs jáne baǵalaý kompaniiasy bar. Osy ǵimaratta jumys istegen uiymdardyń basshylyǵy ázirge túsinik berýden bas tartyp otyr.
