Aqtóbede úi aralap, turǵyndarǵa gaz sharýashylyǵynyń túbirtegin taratatyn júzden astam kontrolerdiń narazylyǵy. 10 aqpan 2022 jyl.
Aqtóbede úi aralap, turǵyndarǵa gaz sharýashylyǵynyń túbirtegin taratatyn júzden astam kontroler jalaqynyń azdyǵyna narazylyq bildirdi. Olardy oblys aýdandaryndaǵy áriptesteri de qoldap otyr. Barlyǵy 179 adam talaptary oryndalmaiynsha gazdyń túbirtegin taratpaýǵa kelisken, dep habarlaidy Azattyq radiosy.
Gaz túbirtegin taratýshylar – QazServiceGroup kompaniiasynyń jumysshylary. Aqtóbeni gazben jabdyqtaýshy KazTransGaz kompaniiasyna billing qyzmetin kórsetetin bul mekemeniń jumysshylary aiyna 60 myń teńge jalaqy alady. Odan bólek ár kontrolerdiń avtobýstaǵy jolaqysy úshin aiyna 7 myń teńge tólenedi. Muny «tym az» dep sanaityn kontrolerler jalaqyny 100 paiyzǵa kóbeitýdi talap etti.
- Osydan on bir jyl buryn jumysqa kirgenimde ailyq 50 myń teńge edi. Qazir - 60 280. Kúnkórisimiz qiyndap ketti. Jalaqyny 100 paiyz kóterýin talap etemiz! Talabymyz oryndalmaiynsha qańtardyń túbirtegin taratpaimyz! Gaz eseptegishterge plomba qoimaimyz, tutynylǵan gazdy eseptemeimiz! - deidi Raihan Ǵabdolova.
Narazylardyń sózinshe, ár kontroler myń jarym abonentke jaýapty. Aitýlarynsha, ár aidyń tórtinen bastap bir apta ishinde myń jarym abonentti túgel sholyp shyǵýy tiis. Gazdyń aqysyn tólemei júrgen boryshkerlerge birneshe márte barýǵa týra keledi.
- Ailyǵym - 60 myń. Basymda kreditim bar. Ózim jalǵyzbasty anamyn. Kiim satyp alýdy umyttyq. Tamaq, kredit, kommýnaldyq qyzmet aqysyn ǵana tóleimiz. Boldy! Qysy-jazy, jańbyr men qarda úi aralap júremiz. Qabaǵan itke talanǵan kezimiz de kóp. Qala úlkeiip jatyr. Sáikesinshe abonent sany da kóbeie tústi. Basshylar qosymsha shtat ashaiyn demeidi. Jalaqymyzdy ósirmese de, júktememiz kóbeiip barady, - deidi Jámila Jumaǵulova.
Gazben jabdyqtaýshylar Aqtóbeni bes ýchaskege bólgen. Osy ýchaskelerden jinalǵan júzden astam kontroler búgin QazServiceGroup kompaniiasynyń keńsesine bardy. Oblys ortalyǵyna aýdandardan jete almaǵandar áriptesteri de qoldaý bildirip, video úndeý joldap jatty. Shalqar, Muǵaljar, Qobda, Hromtaý aýdandarynan joldanǵan videony kórsetken kontrolerlar «bul - oblystaǵy eki júzge jýyq otbasynyń problemasy» deidi. Ázirge narazylarǵa naqty ýáde berilgen joq.
- Biz eshteńe óndirmeimiz. Biz KazTransGaz kompaniiasymen jasalǵan kelisim-shartqa sheńberinde óz mindetimizdi atqaryp qana otyrmyz. Kelisim-shartta bekitilip qoiǵan soma bar. Sondyqtan ázirge jalaqyny kóbeitýge múmkindigimiz joq. Kiristi kóbeitýdiń joldaryn izdep jatyrmyz. Kiris kóbeise ǵana jalaqy ósedi, - deidi QazServiceGroup kompaniiasynyń basshysy Álibek Dosmuhambetov.
Narazylar kompaniia basshysynyń jaýabyna qanaǵattanǵan joq. Jalaqy kóbeimeitin bolsa, 15 aqpanda oblystaǵy eki júzge jýyq kontroler Aqtóbege jinalyp, mitingige shyǵatyndaryn aitty.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
