Aqtóbede 7-17 jastaǵy daryndylardy iriktep, jarystarǵa daiyndaityn fýtbol akademiiasy salynyp jatyr, dep habarlaidy QazAqparat.
«Bizdiń qalada fýtbol keń tanymaldylyqqa ie, jankúierleri kóp. Sondai-aq, biz balalar men jasóspirimderge arnalǵan sport alańdarynyń sanyn arttyryp, buqaralyq sportty damytý jumystaryn jalǵastyrýymyz kerek. Bul – Memleket basshysynyń tikelei tapsyrmasy. Tek kásibi sportqa ǵana emes, sonymen qatar buqaralyq sportqa da jaǵdai jasaý kerek», - dedi qurylys barysymen tanysqan Ońdasyn Orazalin.
Fýtbol akademiiasy «Himik» stadionynyń janynan salynyp jatyr. Akademiia ǵimaraty eki qabatty ákimshilik-turmystyq korpýstan turady. Jattyǵý zaly, em-dom bólmesi, akademiia tyńdaýshylaryna arnalǵan jataqhana, sonymen qatar kúmbez ispetti tóbe jabyndysy qaralǵan. Munda jyl boiy jattyǵýmen ainalysýǵa bolady.
Qurylys keler jyldyń mamyr aiynda aiaqtalyp, qoldanysqa beriledi. Eger eki qabatty ǵimaratty turǵyzýǵa arnalǵan material Slovakiiadan biyl qyrkúiek aiynda ákelinse, nysandy erte paidalanýǵa berýge de múmkindik bar.
Oblys ákimi Ońdasyn Orazalin sport nysanynyń mańyzdylyǵyn atap ótip, jumysty sapaly oryndaýdy tapsyrdy. Sondai-aq, oblys ákimi «Himik» stadionynda júgiretin aqtóbelikter úshin arnaiy jol salý qajettigine nazar aýdardy.
