Aqtóbe oblysy boiynsha 2590 balaǵa ekpe jasalmaǵan. Ata-analardyń bas tartýy 2018 jyly da tirkeldi, dep habarlaidy "Ult aqparat".
Aqtóbelikterdiń ómir súrý uzaqtyǵy 73,6 jasqa jetti. Jyl ótken saiyn qala turǵyndarynyń sany artyp, aýyl halqy azaiyp keledi. Ótken jyly týý kórsetkishi 2 paiyzǵa artty. Óńirde bir jyl ishinde 126 myńnan astam adam dárigerge qaralyp em alsa, onyń 33 myńnan astamyna ota jasaldy.
«Ólim kórsetkishi boiynsha júrek-qan tamyrlary aýrýy, ókpe-tynys aýrýlary men asqazan derti alda tur. Ana men balanyń densaýlyǵyn qorǵaýǵa da kóp kóńil bólinedi. Ókinishke qarai, ótken jyly 1 jasqa deiingi balalar arasyndaǵy ólim kórsetkishi artyp otyr. Qobda, Muǵaljar, Baiǵanin aýdandarynda jii tirkeldi. Birinshiden - uryqtyń jetilmeýi, áiel densaýlyǵynyń nasharlyǵy, ekinshiden - týabitti aýrý, úshinshiden - juqpaly-parazitarlyq aýrýlar sebep. Keide dárigerler ÝZD kezinde dertti anyqtai almai jatady. Oblystyq perenataldyq ortalyqtyń klinika-diagnostika ortalyǵynda ÝZD jasaý orny ashylady. Jeke kompaniiamen kelisim jasaldy, naýryz-sáýir aiynda jumysqa kirisedi», - dedi oblystyq densaýlyq saqtaý basqarmasynyń basshysy Áset Qaliev.
Aqtóbede qaterlik isiktiń aldyn alý maqsatynda qosymsha skrining iske qosyldy. 55 jastan asqan, 30 jyldan astam ýaqyt boiy temeki tartyp júrgen adamdar tekseriledi. Sebebi, ótken jyly ókipedegi qaterli isikten 93 adam kóz jumdy. Ári ekpeden bas tartqandar sany artyp otyr.
«Aqtóbe oblysy boiynsha 2590 balaǵa ekpe jasalmady. Olardyń sany taǵy 59 balaǵa artyp otyr. Temir, Muǵaljar, Baiǵanin, Alǵa, Shalqar, Hromtaý aýdandary men Aqtóbe qalasynda másele bar. Eki jyl buryn arnaiy shtab qurylyp, túsindirý jumystary júrgizildi. Olarmen kezdesýden soń ekpe alyp jatyr. Biraq jańa bosanǵan analar keide balasyna ekpe jasatýdan bas tartady. QR Densaýlyq saqtaý ministrligine májbúrlep vaktsinatsiialaýdy usynǵan edik. Qazir tek halyqqa túsindirýmen shektelip júrmiz», - dedi Áset Qaliev.
