Aqtóbede Dimash Qudaibergenniń qytailyq jankúierlerine arnalǵan týristik marshrýttar jasalyp jatyr, dep jazady QazAqparat tilshisi.
Bul jaily «Aqtóbe aqparat» ortalyǵyndaǵy baspasóz máslihatynda syrtqy bailanystar jáne týrizm oblystyq basqarmasynyń basshysy Ermek Kenjehanuly habarlady.
27 maýsym kúni Astanada Qytaidaǵy án baiqaýyna qatysyp, esimi keńinen tanylǵan Dimash Qudaibergenniń shyǵarmashylyq keshi josparlanǵan. Aspan asty eliniń jankúierleri kontsertke kelip qana qoimai, Dimashtyń týǵan ólkesimen, onyń úiimen jáne otbasymen tanysqysy keledi. Osyǵan bailanysty týristik kompaniialar arnaiy marshrýt uiymdastyrady.
Eske salaiyq, Syrtqy bailanys jáne týrizm oblystyq basqarmasynyń basshysy Ermek Kenjehanuly QazAqparat tilshisine bergen suhbatynda óńirge aldyn-ala esep boiynsha, 2 myńnan astam qytailyq kelip, ánshiniń týǵan jerimen tanysatyndyǵyn aitqan bolatyn.
Týrister Dimashtyń otbasymen de kezdesý múmkindigin alady.
«Ata-anasymen, otbasymen kezdesý bolady. Mindetti túrde Qanat-Sveta Aitbaevtardyń oiyn bilip, bul sharýany birlese atqaramyz. Sebebi, Dimashty olardan artyq eshkim bilmeidi»,- dep atap ótti basqarma basshysy.
Sheteldikterdi ánshiniń týǵan jerimen, otbasymen tanystyrý úshin arnaiy gidter de daiyndalyp jatyr.
«Qazir 2-3 gid daiyn. Olar qytai tilin biledi. Bizge Astanadan da habarlasty. Jinalys kezinde aitylǵan aqparattan soń «qytai tilin bilemiz, kómek kerek bolsa kelýge daiynbyz» degen adamdar boldy», - dedi Ermek Kenjehanuly.
