Aqtóbelikter qyzýdy túsiretin, jedel respiratorlyq virýstyq infektsiiaǵa qarsy dárini jappai satyp alyp jatyr. Oblystyń bas sanitar dárigeri dári-dármek tapshylyǵy týraly aityp berdi, dep habarlaidy "Ult aqparat".
Aqtóbe oblysy boiynda 671 adam koronavirýs infektsiiasyna shaldyqqan bolsa, taǵy 389 simptomsyz jaǵdai tirkeldi. Ósim - 7,3 paiyz. 357 naýqas jazylyp shyqty.
Úi karantininde 2343 adam jatyr. Bári meditsinalyq baqylaý alynǵan. Qazir kópshilik dári-dármekti jappai satyp alýǵa kóshken. Qarapaiym qyzý túsiretin dáriler dárihanada tapshy.
«Aqtóbe oblysynda 600-den astam dárihana, 15 qoima bar. Oblystyq taýarlar men kórsetiletin qyzmetter sapasy men qaýipsizdigin baqylaý departamenti baqylaý júrgizip otyr. Antibiotik pen qyzý túsiretin dári-dármektiń dárihanada azaiǵany baiqalady, biraq qoimada jetkilikti. Turǵyndardyń qorqyp, jappai satyp alyp jatqany ras. Aitarymyz - adamdar óz betimen emdelmeýi kerek. Entigip, qyzýy kóterilip, qatty jótelse dáriger shaqyrǵan jón», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva.
Aita keteiik, óńirde ótken túnde ókpeniń qabynýy dertinen 4 adam kóz jumdy. Onyń naqty diagnozy aidyń sońynda anyqtalady.
Qazir 10 adam jasandy tynys alý apparatyna qosylǵan.
