Aqtóbede dárigerler tiri adamdy ólilerdiń qataryna qosyp jibergen. Sonyń kesirinen 68 jastaǵy Romahan Kenjebaevtyń bar qujaty jaramsyz. Tipti esepshotyndaǵy zeinetaqysy men ailyǵyn da ala almai otyr, - dep habarlaidy Tengrinews.kz agenttigi KTK telearnasyna silteme jasap.
Telearna málimetinshe, emhana qyzmetkerleri tirkeýdegi naýqastardyń jeke sáikestendirý nómirin tergende qate jiberip, Kenjebaevtyń jeke málimeti ólilerdiń qataryna qosylyp ketken. Qujattarynda bir apta buryn "janazasy shyǵarylyp, jerlenipti". Sonyń kesirinen barlyq bank kartochkasy buǵattalyp, júrgizýshi kýáliginen bastap, shetelge shyǵatyn pasportyna deiin jaramsyz bolyp qalǵan.
"Emhanaǵa bardym. Kompiýterde meni óldi dep kórsetip tur. Qalai? Men tirimin ǵoi desem. "Joq, sen ólip qaldyń" deidi. Júgirip HQKO-ǵa bardym. Ailyq ala almai otyrmyn. Barlyq esepshotym buǵattalǵan", - deidi Aqtóbe qalasynyń turǵyny Romahan Kenjebaev.
Romahan Kenjebaevtyń aitýynsha, qateni Aqtóbedegi №4 emhananyń qyzmetkerleri jibergen.
"Emhanadaǵy qaitys bolǵandardy kompiýterge tirkeý kezinde dáriger qatelesipti. JSN-niń sońǵy tsifryn durys jazbai, osy kisiniń málimeti shyǵyp ketipti", - deidi №4 emhananyń bas dárigeri Mereke Nurtazin.
Emhana basshylary ketken qateni moiyndap, zeinetkerdiń bar shyǵynyn óteimiz dep otyr. Ol úshin dáriger-sarapshy notariýs arqyly qolhat ta bergen. Biraq Romahan Kenjebaevtyń tiriler qataryna qujat júzinde qashan qosylary belgisiz. Sebebi, jańa sáikestendirý nómiri berilip, sol boiynsha barlyq kýáligi men pasportyn jańalaý kerek.
