Aqtóbede ótken túni komendanttyq saǵat tártibin buzǵan 83 adam ákimshilik jaýapqa tartyldy. Al blokbeketten ótken kólik jolaýshysynan qarý tabyldy, dep habarlaidy QazAqparat.
Quqyq qorǵaý organdarynyń qyzmetkerleri qoǵamdyq tártipti jáne azamattardyń qaýipsizdigin qamtamasyz etý úshin kúsheitilgen rejimde jumysyn jalǵastyryp jatyr. Oblystaǵy jaǵdai politsiianyń tolyq baqylaýynda.
«Ótken túni komendanttyq saǵatty buzǵany úshin politsiia bólimderine 115 azamat jetkizildi. Onyń 83 ákimshilik jaýapqa tartyldy (30-y qamaýǵa alyndy, 9-yna aiyppul salyndy, 20-yna eskertý berildi). Sonymen qatar qazirgi ýaqytta 3 adam qamaýda otyr. Taǵy 4 adamǵa qatysty bultartpaý sharasy qarastyrylyp, sotqa deiin tergeý jalǵasyp jatyr», - dedi oblystyq PD baspasóz qyzmetiniń jetekshisi Erbolat Sarqulov.
Aqtóbe qalasynyń jáne aýdan ortalyqtarynyń shyǵa berisinde 10 blokbeket ornatylǵan. Onda politsiia qyzmetkerleri men áskeriler qujattar men kólik ishin tekseredi.
«10 qańtar kúni blokbekette 40 jastaǵy júrgizýshiniń basqarýyndaǵy «Vaz-2140» avtokóligi toqtatyldy. Júrgizýshiniń tanysynyń qolynda 12 kalibrli tegis uńǵyly eki myltyq bolǵan. Qarý iesi ákimshilik jaýapqa tartyldy», - dedi Erbolat Sarqulov.
