Aqtóbedegi áskeri bólimde boryshyn óteitin sarbaz "jaǵymsyz iis shyǵarǵanym úshin jazyqty bolyp jazalandym" deidi. Basynan qatty soqqy alǵan Aldiiar Keńesbek qazir úiinde emdelip jatyr, dep habarlaidy ktk arnasy.
"Serjanttyń kesirinen ulym kem bolyp qaldy" degen ata-ana baýyr eti balasyna qiianat jasaǵan áskeri qyzmetkerdi qatań jazalaýdy suraidy. Ári Otan aldyndaǵy boryshy tolyq ótelmegenine qaramastan, ulyn áskerge qaita jibergisi joq.
Áskerge on eki múshesi saý ketken Aldiiar Keńesbektiń qazirgi jaǵdaiy aýyr. Tepse temir úzetin azamat úsh aida tósekten tura almaityn hálge túsken.
Týystary ony Aqtóbedegi 6655 áskeri bólim serjantynyń soqqysy osyndai keselge dýshar etken deidi. Qazir 18 jastaǵy azamat úiinde emdelip jatyr.
Ol maýsym aiynda Tarazdan áskeri boryshyn óteýge barǵan. Jábirlenýshi jatar aldynda kazarmada jel jiberip qoiǵan. Sol úshin serjanttan ońbai taiaq jedim deidi.
"Baiqamai jel shyǵaryp qoidym. Ainalamdaǵylardyń bári "fýi" dep ketti. Basqa jaqqa baryp turǵanmyn. "Kim osyrdy" dep surady? "Men" - dedim. Serjant basymnan oryndyqpen urdy. Ary qarai esimdi bilmeimin, talyp qaldym. Sanitarlyq bólimge apardy, sol jerden esimdi jidym", - deidi Aldiiar Keńesbek.
Jas jaýynger aiaǵynan tura almaityn hálge jetken. Biraq osy qiyn jaǵdaiymen ol eki ai súiretilip, aqyry aýrýhanaǵa jatqyzylypty. Sol jerden belgisiz bireý naýqastyń týystaryna habar bergen. Aqtóbege shuǵyl jetken ákesi ulyn Tarazǵa alyp qaitady. 7-qazanda emdeýge berilgen demalys merzimi aiaqtalyp, Aldiiar qaita oralýǵa tiis. Biraq ákesi ulyn jibergisi joq.
"Qaitip jiberemin? Ótkende men barmaǵanda balanyń óligin ákeledi ekenmin, shynyn aitqanda!" - deidi Aldiiardyń ákesi Keńesbek Ábdiraimov.
Aqtóbedegi 6655 áskeri bólimi jaǵdaiǵa qatysty resmi túsinikteme bermedi. Esesine, áskeri prokýratýra «qyzmet babyn asyra paidalaný» baby boiynsha is qozǵalǵanyn málimdedi.
"2022 jyldyń 20 qyrkúieginde Ulttyq ulannyń 6655 áskeri bóliminde qyzmettik ókilettigin asyra paidalaný deregi boiynsha Batys óńirlik áskeri tergeý basqarmasynyń Aqtóbe bólimi 451-baptyń 1-bóligi boiynsha sotaldy tergep-tekserýdi bastady", - dedi Aqtóbe garnizonynyń áskeri prokýrory Jandarbek Span.
Keńesbek Ábdiraiymov uly kemtar bolyp qala ma dep qaýiptenedi. Ol balasyna álimjettik jasaǵan áskeridi eshqashan keshirmeimin deidi. Sondyqtan ony bul saladan alastatyp qana qoimai, qatań jazalaýdy talap etedi.
