Foto: Polisia.kz
Aqtóbe oblysynda balasyn óltirgen áke ómir boiyna bas bostandyǵynan aiyryldy, dep habarlaidy "Ult aqparat" oblystyq sottyń baspasóz qyzmetine silteme jasap.
Búgin Aqtóbe oblysynyń qylmystyq ister jónindegi mamandandyrylǵan aýdanaralyq sotynda QK-tiń 99-babynyń 3-bóligimen (Jas balany óltirý) kózdelgen qylmys jasaǵan A.-ǵa qatysty úkim jariialandy.
Byltyr 23 jeltoqsanda azamat A. óziniń salqyn tiip aýyryp turǵan 4 jasar balasy D.-nyń mazasyzdanyp, jylaǵanyna ashýlanyp, basy, beti jáne ishki tustarynan birneshe ret urǵany anyqtaldy. Bala esinen tanyp, bas súiegi jaraqattanyp, qansyraý saldarynan qylmys ornynda qaitys bolǵan.
Kelesi kúni balanyń ákesi asa aýyr qylmysty jasyrý maqsatynda balasynyń máiitin aidalaǵa kómip tastaǵan.
"Sottalýshy ózine taǵylǵan aiyp boiynsha kinásin moiyndamai, balasy oinap júrip jerge qulap, keiin basyn oryndyqqa uryp qaitys bolǵanyn, sasqalaqtap, politsiiaǵa, jedel járdemge habarlamastan ekskavator jaldap, tereńdigi 2 metrden astam shuńqyr qazdyryp, jasyryn jerlep tastaǵanyn, birneshe kúnnen soń balanyń joǵalǵany týraly politsiiaǵa habarlaǵanyn, keiin shydai almai jerlegen jerin óz erkimen kórsetkenin aitty.
Prokýror taǵylǵan aiypty tolyqtai qoldap, sottan azamat A.-ǵa ómir boiyna bas bostandyǵynan aiyrý jazasyn taǵaiyndaýdy surady" - delingen habarlamada.
Sot baspasóz qyzmetiniń málimetinshe, jaza taǵaiyndaý barysynda qylmystyq jaýaptylyq pen jazany jeńildetetin nemese aýyrlatatyn mán-jailar anyqtalmaǵan.
"Sot jasalǵan qylmystyń sipaty men aýyrlyǵyn, qoǵamǵa qaýiptiligin, qylmysty jasaý mán-jailaryn, balaǵa keltirilgen dene jaraqattarynyń aýyrlyǵyn eskere otyryp, ómir boiyna bas bostandyǵynan aiyrý jazasyn taǵaiyndady.
Sotta isti qaraý barysynda anyqtalǵan zań talaptaryn eleýli buzýshylyqtar jáne jaýapty tulǵalardyń óz qyzmettik mindetterine nemquraily, salǵyrt qaraýy saldarynyń nátijesi jas bala ólimine ákelip soqtyryp otyrǵandyqtan, sotpen Aqtóbe oblysynyń politsiia Departamenti jáne oblystyq bilim basqarmasy atyna jeke qaýly shyǵaryldy" - delingen habarlamada.
Sot úkimi zańdy kúshine engen joq.
