Aqtóbe oblysynda "oramal daýyna" bailanysty balalary mektepke barmai otyrǵan eki ata-anaǵa 12625 teńgeden (bes ailyq eseptik kórsetkish nemese AEK) aiyppul salyndy. Olardyń balalary Aqtóbe qalasyndaǵy №8 jáne №60 mektepte oqidy. Bul týraly Aqtóbe oblysynyń bilim salasyndaǵy baqylaý departamentiniń bólim basshysy Janar Muhambetalina aitty, dep habarlaidy Azattyq agenttigi.
- Taǵy eki ata-anaǵa bes AEK-ke teń aiyppul salyndy. Olar Ákimshilik quqyq buzýshylyq kodeksiniń 409-babynyń 2-tarmaǵynda kórsetilgen ("Ata-analardyń nemese ózge de zańdy ókilderdiń bilim berý zańnamasynda kózdelgen mindetterdi oryndamaýy nemese tiisinshe oryndamaýy") talapty buzdy dep aiyptalyp otyr, - deidi Janar Muhambetalina.
Aqtóbe oblystyq bilim basqarmasynyń dereginshe, qazir oblys aýmaǵynda "mektep formasyn buzǵandyqtan" sabaqqa qatysa almai otyrǵan 10 bala bar. Olar eki toqsan boiy sabaqqa kelmegen. Bilim departamenti bul balalardyń ata-analarymen túrli túsindirý jumystaryn byltyrdan júrgizip keledi.
Aqtóbe oblysynyń bilim salasyndaǵy baqylaý departamenti 2018 jyly "oramal daýyna" orai jalpy sany 33 ata-anaǵa aiyppul salǵan. Biyl bul sanatqa taǵy eki ata qosyldy. Ákimshilik shara qoldanylǵandardyń segizi - Aqtóbedegi №31 mekteptiń ata-analary.
№31 mekteptiń burynǵy direktory Sáýle Baimaǵambetova "oramal daýynan ábden qajyp, qyzmetinen ketýge májbúr bolǵanyn" aitady. Sáýle Baimaǵambetova qazir ózi basqarǵan mektepte fizika páninen sabaq berip júr. Bul mekteptiń oramal tartatyn alty oqýshysy qyrkúiekten beri mektepke kelmegen.
Buǵan deiin Aqtóbe qalalyq soty oramal daýyna bailanysty qaladaǵy ondaǵan mektep direktorynyń ústinen ata-analar túsirgen shaǵymyn qanaǵattandyrmaǵan. Ata-analar oramal tartatyn qyzdaryn mektepke kirgizbegen mektep direktorynyń is-áreketin zańsyz dep tanýdy suraǵan.
