Aqtóbede kópqabatty úidiń podezine áielmen ilese kirip, ony urǵan kúdikti ustaldy, dep habarlaidy "Ult aqparat".
Aqtóbe politsiiasy áleýmettik jeli arqyly tarap ketken videodaǵy kúdiktini tapty. Beinematerialdan kópqabatty úidiń podezine áielmen birge ere kirgen er adam birden onyń moiynyna jarmasyp, judyryǵymen urǵanyn kórýge bolady.
«Politsiia qyzmetkerleri podezde áieldi uryp-soqqan kúdiktini ustady. Oqiǵanyń mán jaiyn bylai boldy: 26 sáýir kúni saǵat 16:30-da belgisiz er adam Aqtóbe qalasynyń 12 shaǵyn aýdanyndaǵy kóp qabatty úilerdiń biriniń kireberisinde áieldiń artynan júgirip kirip, jerge qulatyp, bir ret uryp, qashyp ketken. №2 Aqtóbe qalalyq politsiia basqarmasynyń politsiia qyzmetkerleri jedel is-sharalar keshenin ótkizdi. Osy aýdanda ornalasqan beinebaqylaý kameralaryn qarady. Nátijesinde kúdikti adam anyqtalyp, ustaldy. Ol 33 jastaǵy Hromtaý aýdanynyń turǵyny bolyp shyqty», - dedi Aqtóbe qalalyq politsiia basqarmasy bastyǵynyń orynbasary Talǵat Berdenov. Qazir osy derek boiynsha Qylmystyq kodekstiń «Buzaqylyq» babymen is qozǵalyp, sotqa deiingi tergeý júrip jatyr. Politsiia qyzmetkerleri kúdiktimen sóilesýge múmkindik jasady.
«Aqtóbe qalasynda inimmen birge páter jaldap turdym. Júk tasýshy bolyp jumys ta istedim. Al dál qazir jumyssyzbyn. Men sol kúni ishimdikti kóp iship, esimdi bilmegenmin. Biraq kinámdy moiyndaimyn. Apaidy tanymaimyn. Óz úiimniń podezine kirdim dep eseptedim», - dedi kúdikti.
Aita keteiik, kúdikti buǵan deiin de kóshede ishimdik ishkeni úshin ákimshilik jaýapqa tartylǵan. Politsiia departamentiniń habarlaýynsha, zardap shekken áiel dárigerge qaralyp, úiine jiberilgen.
