Aqtóbede jergilikti tis emdeý mekemesinde arnaiy operatsiia ótip, tis dárigerin kepilde ustaǵan er adamnyń kózi joiylǵan edi. Er adam burynǵy áielin alyp kelýin talap etken, bul talaby oryndalmasa kepildegi áieldi óltiremin dep qorqytqan. Oqiǵanyń videosy paida boldy, - dep habarlaidy kaz.tengrinews.kz.
Jergilikti turǵyn tis dárigerin mekeme ǵimaratynyń ishinde kepilge alǵan. Aldyn ala málimet boiynsha, bul stomatologiiada onyń burynǵy áieli jumys istegen. Oqiǵa keshki ýaqytta bolǵandyqtan, medmekemeniń ǵimaratynda klient bolmaǵan, tek personaldan birneshe adam qalǵan. Oqiǵa "Batys" aýdanynda boldy.
Áleýmettik jelilerde Aqtóbe turǵyndary oqiǵa ornynan sýret pen videolar jariialap jatyr. Kýágerler oqiǵa ornyna tipti tikushaqtyń qonǵanyn aitty.
"14 naýryzda saǵat 19.00-de Aqtóbe politsiiasyna belgisiz er adamnyń stomatologiia ákimshisi - 1991 jylǵy azamatshany kepilge alyp, óltiremin dep qorqytqany jaily habar tústi. Er adamnyń qolynda pyshaq bolǵan. Politsiia oqiǵa ornyna kelgennen keiin qylmyskerdiń jeke basyn anyqtady, ol 1993 jylǵy azamat, jumyssyz, 2016 jyly urlyq úshin qylmystyq jaýapkershilikke tartylǵan", - dep habarlady Aqtóbe oblystyq IID ókilderi.
Politsiianyń málimetinshe, qalalyq azamat ózimen jasty burynǵy áielin ákelýdi talap etken. Ekeýi 7 naýryza ajyrasyp ketken eken. Aqtóbe oblystyq IID ókilderi kúdiktiniń oqiǵaǵa deiin burynǵy áieliniń ata-anasyna kelip, burynǵy enesine pyshaq jaraqatyn salǵanyn shuǵyl túrde anyqtaǵan. Enesi aýyr jaraqat alǵan. Kúdikti ony óltiremin dep qorqytyp, kezdestirýin talap etken.
"Aqtóbe oblystyq IID basshylyǵy, IIB jáne Aqtóbe prokýrory 5 saǵat boiy kelissóz júrgizip, kepilge alynǵan áieldi bosatýyn suraǵan. Alaida qylmysker talapty oryndaýdan bas tartqan. Onyń týystary da oqiǵa ornyna kelip, áieldi bosatýyn suraǵan. Qylmysker bolsa kepildegi áieldi óltiretinin aitqan, onyń ornyna burynǵy áielin ákelip berýdi talap etken. Ol burynǵy áielin óltirýdi burynnan josparlaǵanyn málimdedi. Bes saǵat boiy júrgizilgen kelissóz nátije bermegendikten jáne máseleni beibit sheshý joldarynyń joqtyǵyn, al qylmyskerdiń minýt saiyn ashýǵa berilgenin esepke ala otyryp, politsiia qyzmetkerleri túngi saǵat 12-de kepildegi áieldi bosatýǵa arnalǵan kúsh fazasyn ótkizdi. Kúsh qurylymdary tabel qarýyn qoldanýy barysynda qylmyskerdiń kózi joiyldy. Kepildegi áiel zardap shekpedi, alaida júike kúizelisine ushyrady. Qazirgi ýaqytta oǵan dárigerler men psihologtar kómek kórsetip jatyr", - dedi vedomstvodaǵylar.
Politsiianyń málimetinshe, Aqtóbe qalalyq IIB osy derekke bailanysty sotaldy tergeýdi bastaǵan.
