Aqtóbe oblysy Yrǵyz aýdanynda avtobýspen bolǵan tótenshe jaǵdaidan aman qalǵandar aýrýhanadan shyǵaryldy. Bul týraly Oblystyq densaýlyq saqtaý basqarmasynyń basshysy Áset Qaliev aitty, - dep habarlaidy Tengrinews.kz tilshisi.
"Búgin olar aýrýhanadan shyǵaryldy. Barlyǵynyń jaǵdaiy qanaǵattanarlyq", - dedi oblystyq densaýlyq saqtaý basqarmasynyń basshysy.
Ózbekstannyń eki azamaty men Ońtústik Qazaqstannnyń úsh turǵyny 18 qańtardan beri aýrýhanada jatqan bolatyn. Ózbekstandyqtardyń qashan úilerine qaitatyny jaqyn arada belgili bolady.
Eske salaiyq, osyǵan deiin Aqtóbede avtobýs órtenip, 52 adamnyń qaza tapqany jaily habarlanǵan bolatyn. Ikarus markaly avtobýstyń 18 qańtarda saǵat 10:30-da Aqtóbe oblysy Yrǵyz aýdanynda Samara - Shymkent tasjolynyń 1068 shaqyrymynda, Qalybai aýylynan 10 shaqyrym jerde órtengeni aitylǵan edi. Avtobýstyń ishinde 55 jolaýshy jáne eki júrgizýshi bolǵan. Onyń beseýi avtobýstan shyǵyp úlgergen. Keiin oqiǵa ornynda túsirilgen video men fotosýretter jariialandy.
