Aqtóbe oblysy, Baiǵanin aýdany Qaraýylkeldi aýylynyń turǵynynan 40 dana kiik múiizi tárkilendi, dep habarlaidy "Ult aqparat".
Qazirgi ýaqytta 32 jastaǵy kúdikti qamaýǵa alyndy. Qylmystyq kodekstiń «Sirek kezdesetin jáne quryp ketý qaýpi tóngen, sondai-aq paidalanýǵa tyiym salynǵan ósimdikter men janýarlar túrlerin, olardyń bólikterin nemese derivattaryn zańsyz paidalaný» baby boiynsha sotqa deiingi tergeý bastaldy.
«Kiik múiizi birneshe polietilen paketine oralǵan. Múiizdiń bári tárkilendi. Politsiia tergeýdi jalǵastyryp jatyr. Atalǵan sanktsiia boiynsha 3 jyldan 5 jylǵa deiingi bas bostandyǵynan aiyrý nemese múlkin tárkilep, sol merzimge bas bostandyǵyn shekteý jazasy kózdelgen», -dedi oblystyq PD baspasóz qyzmetiniń jetekshisi Erbolat Sarqulov.
